Hevur tú hugsað um, hvussu tú skapar ein góðan felagsskap fyri børn?

Her kanst tú lesa um, hvussu tú við spølum skapar trivnað og gott samanhald.

Ein barnafelagsskapur kann sammetast við eina plantu. Plantan má røktast og hava vatn, til tess at nørast og gerast vakrari. Smáu spírarnir á plantuni eru børn, sum mennast og trívast eins og plantan. Við øðrum orðum er tað tann vaksni, sum má skapa góðar karmar fyri, at hendan planta kann vaksa og skapa tryggleika.

Tvey sløg av felagsskapum

Fyri at tryggja okkum ein fevnandi barnafelagsskap, mást tú hava ein virknan leiklut í tilgongdini. Felagsskapir eru í støðugari menning, tí mást tú samstundis arbeiða støðugt við felagsskapinum hjá børnunum. Eitt gott hugskot er at hyggja eftir, hvørjum felagsskapum tú kanst arbeiða við.

Børn hava ikki avgjørt, hvørjum tey koma saman við í barnagarðinum ella í skúlanum – formellum felagsskapum. Hesum felagsskapinum hevur tú ábyrgdina av.

Ein óformellur felagsskapur er, tá børn hava eitt gott samband við hvønn annan. Tey velja hvønn annan út frá serligum samspæli – nakað serstakt, tey hava í felag.

Tá tú roynir at skapa jaligan formellan felagsskap, hevur tú longu sáað eitt lítið fræ: Hetta birtir upp undir góðar treytir fyri óformellum felagsskapi, har børnini hava møguleika at læra hvønn annan at kenna, gerast vinir og menna seg.

Felagsspæl sum amboð

Felagsskapir koma ikki altíð av sær sjálvum. Karmarnir mugu vera í lagi, og her kann felagsspæl nýtast sum ein góð venjing til góða samveru við onnur. Spælið má verða skipað av vaksnum, um góð úrslit skulu spyrjast burturúr.

Fri for Mobberi hevur spurt stovnaran av Legefabrikken, Balder Brøndsted, hví felagsspæl er eitt gott og fevnandi amboð.

“Tað, sum er nakað serligt við felagsspælinum, er, at har er ein bólkur av børnum, sum spæla saman. Har er ein anonymitetur, tí øll eru við. Felagsspæl er felagsskapur av børnum, sum skapa og menna nakað saman. Og her kunnu vaksin vera við at skapa ein felagsskap rundanum felagsspælið. Eg haldi, at tað er sera umráðandi, at har eru vaksin, ið bera tað víðari.”

Her eru 6 góð ráð, hvussu tit kunnu arbeiða við felagsspæli sum eitt amboð í gerandisdegnum:

1. Tú skalt sjálv/ur luttaka. Tú skapar tryggleika við at luttaka í spælinum – og tú ert tann, ið stýrir. Hetta skapar tilknýti til tín sum umsorganarpersónur.
2. Syrg fyri, at øll hava møguleika at eydnast í spælinum. Lat ikki kapping koma í, har onkur fer úr spælinum.
3. Gev pláss til, at børnini kunnu koma við egnum hugskotum í spælinum.
4. Sigur eitt barn: “Eg tími ikki”, merkir tað oftani: “Eg veit ikki, hvat tú vilt hava meg at gera” ella “Eg vil ikki vera til láturs”.
5. Far ikki eftir teimum børnum, sum trekkja seg ella “fjolla” runt. Um tú oftani rýmir frá spælinum, missa børnini áhugan.
6. Hav fokus á spælið í støðuni. Um spælið fer ov nógv av sporinum, ella um ferðin gerst ov høg, kanst tú fáa børnini at fella til ró aftur við rímum, ramsum ella skipaðum spæli so sum “Bjørnin svevur”.
   Um tú leggur til merkis, at børn trekkja seg, kanst tú broyta spælið til frama fyri tey børnini.

Ert tú áhugað/ur í felagsspølum? Ver við í ókeypis “webinarinum” mikudagin 24. august 2022, kl: 14-15. Balder Brøndsted fer at siga meira um, hvussu felagsspøl kunnu vera við til at fyribyrgja happing millum børn Ókeypis webinar .

Til ta tíð kanst tú royna nøkur felagsspøl, sum eru í bókini:  “Saman í náttúrini”, í fakheftinum ella á Ókeypis virksemi hjá Fri for mobberi.

Skrivað greinina hevur: Lene Lykkegaard

Umsett: Barnabati

August 2022

BAMSA, ÓKEYPIS VIRKSEMI, EVNI,