Hey ‘Anonyma’
Deiligt, at tær dámar brævkassan:-) – Vit gera okkara allarbesta og royna at svara spurningum til brævkassan skjótast gjørligt, men hevur tú átroðkandi spurningar, er frægast at ringja til Tú & Eg Ráðgevingin telefonina, so fært tú greið boð beinanvegin:-)
P-bollar er ein tann mest nýtta verjan ímóti at gerast við barn. Fyri at tú skal gerast við barn, krevst at eitt egg frá tær er klárt at verða befruktað av sáðkyknuni frá manninum. P-bollar gera at tú ikki hevur eggloysn, t.v.s. einki egg verður klárt at verða befruktað og tú verður sostatt ikki við barn, um tit brúka hít ella ikki.
Meginreglan er sostatt at etur tú p-bollar regluliga, verður tú ikki við barn, sjálvt um tú og sjeikurin ikki brúka hít.
P-bollar er ein tann tryggasta verjan ímóti at gerast við barn UM tú etur teir regluliga.
Um tú ikki etur p-bollar regluliga, er tað tryggast at brúka hít afturat. Gloymir tú t.d. ein ella tveir p-bollar ein mánaða er umráðandi at tit brúka hít restina av tí mánaðinum.
Eisini er sera umráðandi at tit brúka hít, um tú hevur havt spýggisjúku og p-bollin tí ikki er sloppin at virka í kroppinum.
Hetta hevur tó ikki ávirkan á mánaðin eftir – tá virkar p-bollin aftur sum vanligt.
P-bollar verja IKKI ímóti kynssjúkum, og er tí ikki nøktandi verja, um tú ella sjeikurin hava verið í song við onkrum øðrum.
Vónandi er hetta svar nøktandi – tú kanst eisini lesa meir um verju undir EG & LÍVIÐ Kynslív Verja, ella á www.sexlinjen.dk, og tú er sjálvandi vælkomin at skriva ella ringja til okkara aftur.

Vinarliga
Tú & Eg Ráðgevingin