Góða tú, sum hevur desperat brúk fyri hjálp!
Tú skrivar nógv í tínum brævi, men tá eg lesi títt bræv, er tað allíkavæl torført at siga, hvat tín trupulleiki er. Tú sigur, at tú hevur stórar trupulleikar, sum fylla meira og meira inni í tær, at tú hevur torført við at halda skil á kenslunum, men so sigur tú eisini, at tú hevur verið hjá 5 sálarfrøðingum, og at tað ikki hevur hjálpt tær. Tað ljóðar sjálvandi ógvisligt, men hevur tú gjørt tær heilt greitt, hvat tað er, tú vilt tosa við sálarfrøðingin um? Tað er torført at hjálpa tær, um tú ikki sigur, hvat tað er, sum er galið. Royn at skriva tað, sum er torført fyri teg, niður á eitt pappír ella tak hetta brævið, sum tú hevur skrivað til okkum,  við til sálarfrøðingin, tá tú fert til hannhana. Eg haldi, at tað ljóðar, sum at tú skalt halda fram hjá sálarfrøðinginum til tú fært ta hjálp, sum tú hevur tørv fyri. Um tú ert givin at ganga hjá sálarfrøðinginum, kundi tú farið til læknan fyri at vita, um hann kann siga tær, hvar tú skalt fáa tær hjálp. Tú býrt saman við mammu tínari, og eg hugsi um, hvat hon heldur, at tú skalt gera. Tú sigur, at tey sum ringja til mammu tína ikki ynskja at tosa við teg. Men hvør er tað, sum ringir til mammu tína, eru tað hennara vinfólk? So er tað kanska ikki so løgið, at tey vilja tosa við hana og at tað onki hevur við teg at gera. Tað kann so ikki vera tín skyld, hvat tú so enn meinar við tað. Fyri okkum í brævkassanunum er tað torført at hjálpa tær, tá vit vita so lítið,  men um tú ynskir tað, ert tú vælkomin at skriva aftur.

Blíðar heilsur

Tú & Eg Ráðgevingin