Góða Diddan.
Tá fólk spýggja dagliga, sum vinkona tín ger, so er tað aloftast tí tey hava bulimi. Bulimi er ein av sjúkunum sum vit kalla etingarólag. Anoreksi er ein onnur. Tey sum hava bulimi og spýggja, gera tað sum oftast tí tey ikki vilja taka uppá í vekt. Tað er ikki gott at spýggja hvønn dag, og fleiri ferðir um dagin, tí tað kann hava álvarsligar avleiðingar. Eg eri glað at hoyra, at vinkona tín ikki spýr so ofta longur. Men eg haldi, at onkur vaksin burdi fingið at vita, at hon ger hetta, tí etingarólag er vandamikið, og hon skal hava hjálp, um tað er tað, sum henni feilar, tí tað er ikki altíð lætt at sleppa burtur úr slíkum sjálvur.
Tíverri hava vit einki um etingarólag á okkara heimasíðu, men tað kemur sikkurt onkuntíð í framtíðini. Men inni á heimasíðuni www.spiseforstyrrelser.dk kanst tú lesa meira um bulimi og onnur sløg av etingarólag.

Vinarliga
Tú & Eg Ráðgevingin