Góða genta, ið følir teg uttan kærleika!
Takk fyri brævið! Tað er ikki lætt at ganga við sovorðnum kenslum, sum tú gongur við. Ein tann ringasta kenslan, ein kann hava, er at kenna seg  uttan kærleika frá sínum nærmastu. So tað er sterkt  av tær, at tú skrivar nú og biður um hjálp til at fáa tað betur. Tíbetur er tað soleiðis, at tað ber til at fáa kærleika frá øðrum enn teimum, sum eru eins nærmasta familja. Tú ert 14 ár, so tú hevur eitt langt og vónandi gott lív frammanfyri tær, har tú kanst koma at føla stóran kærleika fyri øðrum og fáa líka stóran kærleika aftur frá øðrum. Tað kunnu vera onnur í tínari familju, sum kunnu geva tær størri umsorgan og kærleika enn tíni foreldur. Kanska skalt tú royna at søkja meira til tey, sum tú følir eru góð við teg. Tað kann eisini vera, at foreldrini ella familja hjá tínum vinkonum kunnu geva tær nógv gott. Eg skilji væl, at tú vildi ynskt, at tey vóru tíni foreldur, men tíverri ert tú í tí óhepnu støðu, at tíni foreldur kanska ikki eiga so nógva umsorgan og kærleika at geva øðrum. Soleiðis eru summi menniskju, og tað er óheppið, at vaksin, sum ikki eiga nóg  mikið at geva øðrum, gerast foreldur, tí tað ger tað so trupult fyri børnini. Tú hevur tað so mikið trupult, at eg haldi, at tú skuldi kontaktað heilsufrøðingin í tínum skúla og greitt henni frá, hvussu tú hevur tað. Hon kann hjálpa tær at tosa við mammu tína, og um tað ikki er nóg gott, so kundi hon hjálpt tær at tosað  við Barnaverndartænastuna í tínum øki, sum hevur skyldu at hjálpa børnum upp til 18 ár, sum onkursvegna ikki hava tað gott. Tey kunnu hjálpa tær, við t.d. at koma ókeypis til sálarfrøðing, sum kann hjálpa og styrkja teg fyri at fáa eitt betri lív. Tú kanst finna tín heilsufrøðing inni á www.gigni.fo www.bvs.fo og tú kanst lesa meira um rættindir hjá børnum og hvussu børn í Føroyum kunnu fáa hjálp, inni á Tú ert eisini hjartaliga vælkomin at kjatta við ein ráðgeva inni á barnabati.fo

Blíðar heilsur Tú & Eg Ráðgevingin