Góða tú, ið ikki veitst!
Takk fyri brævið! Tað er gott at tú bara oysir út av tínum tankum og kenslum. Tú hevur ikki sett nakran spurning, so eg rokni bara við, at tú hevur mest brúk fyri at fáa luft. Tá tú greiðir frá tykkara parlagi, er tað við sera blandaðum kenslum, og tað er tað, ið ger teg forvirraða, tí tit viðhvørt hava tað gott saman, men ofta eru í ringum lag, tá tit eru saman við øðrum. At tú hevur verið ótrúgv, er eitt týðiligt tekin um, at tit eru ótrygg og ónøgd. Tit hava bert gingið saman í so stutta tíð, at tað er eitt sindur løgið, at tit longu hava allar hesar trupulleikarnar. Tit hava verið vinfólk, áðrenn tit byrjaðu at ganga saman, og tað hevur nokk verið lættari tá, enn tað er nú. Tú ert ill og hevur lítið forstáilsi fyri honum og hansara atburði, og hóast hann hevur sagt, at hann hevur fyrigivið tær 2 ferðir, at tú hevur verið ótrúgv, so nívir tað hann, og tað er heilt natúrligt. Tað kann vera lætt at siga, at ein kann fyrigeva ótrúskapi, men tað er sera ringt at gera av heilum hjarta, tá hann er sáraður og samstundis góður við teg og kanska ikki vil missa teg. Tað besta fyri tykkum bæði hevði verið at funnið út av, hvussu tit ynskja at hava saman: um tit ynskja at liva saman sum par, sum vinfólk ella hvat? Tað, sum er mest umráðandi er, at tit fara væl við hvørjum øðrum og tykkum sjálvum, óansæð hvat, ið tit velja at gera..

Góða eydnu við kærleikanum!

Blíðar heilsur Tú & Eg Ráðgevingin