Góða genta, ið følir teg so einsamalla!
Tað gleðir meg at hoyra, at tú fyrr hevur fingið góða hjálp frá Tú & Eg Ráðgevingini. Vónandi fært tú brúkt ráðgevingina  hesuferð eisini. Sum tú greiðir frá, so møtast tú og sjeikurin hjá tær bert á netinum, men hava avtalað, at tit vilja møtast skjótt. Nú stutt áðrenn tit skulu møtast, er hann farin at ivast í, hvat tykkara parlag er í veruleikanum, og tað ger teg sjálvandi ótrygga, at hann er farin at ivast og hugsar um møguliga at gera tað liðugt.

Síðan spyrt tú, hvat tað er, ið tú gert galið. Tað er ringt at siga, um tað er nakað, ið tú gert galið. Haldi, at tú ert í so hørð við teg sjálva. Tú sigur, at tú ert sera opin og tosar um alt við hann. Tað kundi ljóðað sum um at tú tosar mest ella í so nógv við hann um trupulleikar hjá tær, og tað kann vera, at hann ikki orkar at tosa og fyrihalda seg til tað meir. Tað er umráðandi at tosa um ymiskt annað enn trupulleikar, og at tú ert ein góður áhoyrari og lurtar við áhuga, tá hann tosar um seg og tað, sum hann vil tosa við teg um.

Tú hevur eina keðiliga mynd av tær sjálvari: at eingin tímir at tosa við teg ella vera saman við tær. Tað má vera ein sera pínufull støða at vera komin í. Tað finnast nógv onnur ung, sum eru í somu støðu sum tú, og gott hevði verið, um tað hevði verið eitt møtistað á netinum fyri føroysk ung, ið kenna seg einsamøll. Í Danmark er ein felagsskapur, ið hjálpir einsamøllum ungum at finna onnur ung í somu støðu. Teirra heimasíða er www.ventilen.dk og kanska tú kundi roynt at farið inn á ta heimasíðuna at vita, um nakað er har, sum kann hjálpa tær.

Bestu heilsur Tú & Eg Ráðgevingin