Góða tú, ið spyrt, um tú ert lesbisk!
At taka ”testir” á alnótini kann vera stuttligt, men tað er absolutt ikki nakað, ið ein skal taka fyri fult og halda vera ”tað rætta” ella ”sannleikin”. Tù hevur tikið eina ”test” ið sigur, at tú ert 59 % lesbisk – og hvat so? Hatta sigur hvørki eitt ella annað og eg haldi tú bara skalt flenna at tí og siga ”takk fyri hjálpina”. Tù sigur, at tú hevur kenslur fyri vinkonuni hjá tær. Tað er heilt vanligt, at gentur hava kenslur fyri gentum – og sínum vinkonum. Tú nýtist ikki vera lesbisk av teirri grund. At tendra uppá sítt egna kyn eru tað nógv sum gera – eisini tey ið eru heteroseksuell. Tað kann gott vera, at tú ert lesbisk og tað kann gott vera, at tú ikki ert tað. Tú kanst jú eisini vera biseksuell – and so what! Tað er líka mikið, um tú nú ert til hettar ellar hattar. Tað, sum hevur týdning fyri teg er, at tú góðtekur teg sjálva fult og heilt soleiðis sum tú nú einaferð ert skrúvað saman. Og at tú virðir tín egna seksualitet og seksualitetin hjá øðrum. Vit eru øll ymisk og tað hava vit loyvi til at vera. Ert tú forvitin eftir at vita meira um homoseksualitet, kanst tú seta teg í samband við LGBT Føroyar á heimasíðu teirra www.lgbt.fo. Tey veita eisini kunnan og ráðgeving til fólk, ið fegin vilja vita meira um seksuellar minnilutabólkar.  

Kærar heilsur Tú & Eg Ráðgevingin