Halló Forelskaða
Forelskilsi kann vera tað allar besta og tað kann eisini vera tað mest torføra. Tað er ein fantastisk kensla, tá ið man fær tann, ið man er forelskaður í. Men tað er ikki deiligt at vera forelskaður í einum, ið man ikki fær, tí at tá kann man fáa ilt av forelskilsinum.
Tær nýtist ikki at angra, at tú skrivaði eitt bræv til drongin, ið tú ert forelska í, tí at tað var sera djarvt av tær. Tað var flott gjørt, tí at tú hevur verið forelskað í honum leingi og tú helt hann møguliga eisini vera forelskaðan í tær. Tú royndi at finna út av, hvussu støðan var og meira kanst tú ikki gera.
Men eg skilji væl, at tú ert kedd av og at tú nú angrar, at tú skrivaði brævið til hansara, nú tá ið hann ikki hevur svarað og faktiskt eisini er hildin uppat við at tosa við teg. Tó tað eru ikki øll, ið eru líka djørv sum tú. Kanska veit hann ikki, hvat hann skal siga ella møguliga torir hann ikki at siga tað, ið hann ætlar sær. Tað eg vil siga við hesum er, at tú skalt kenna teg væl og hugsa at tú hevur gjørt tað tú kundi. Gev honum tíð, tosa tú við hann sum vanligt og hendir einki ella hevur hann ikki huga at ganga saman við tær, so er tað tað. Tú skal eisini hugsa um at 13 ára gamlir dreingjir ikki altíð hava sama hug á gentum, sum gentur hava á dreingjum í hasum aldrinum, so tað kann eisini vera ein orðsøk.

Alt tað besta.
Tú & Eg Ráðgevingin