Góða forelskaða ella ikki!!
Tú setur nakrar spurningar um tínar kenslur fyri einum drongi í tínum flokki – um tú ert forelskað í honum ella ikki? Um tær dámar hann ella ikki? Hvussu tú kanst koma í samband við hann o.s.fr.

Tað er ikki so einfalt hjá okkum at svara uppá, um tú ert forelskað í honum ella ikki. Men kundi tað hugsast, at tú gjørdist eitt sindur øvundsjúk, tá hann fór at fjasa við eini aðrari gentu? Ella føldi tú at tú misti hann sum vin? Royn at hugsa um tað, tí tað ljóðar sum um at tú hevur onkran áhuga fyri dronginum, og tað kann tað vera, at tú hevur kenslur fyri honum, men er tað sum vin ella sum ein tú kundi hugsa tær at gingið saman við?

Annars so eru tað nógvir mátar at koma í kontakt við drongin uppá. Tú kanst t.d. tosa við hann um felags áhugamál, ella vísa áhuga fyri tí hann ger. Men mest av øllum trúgvi eg bara, at tú skalt royna at vera tann tú ert, og vísa honum áhuga. Tí um hann hevur havt áhuga fyri tær fyrr, so er tað nokk ein stórur møguleiki fyri at hann enn hevur áhuga fyri tær.

Góða eydnu!

Tú & Eg Ráðgevingin