Hey hey og stóra takk fyri brævið!
Tað er ikki bara tú, ið gongur og pínist av spurningum og ivamálum av hasum slagnum. Tað eru tey flestu, ið kenna okkurt av hasum aftur, frá at ein hevur verið forelskaður og hevur havt hjartasorg ella er í somu støðu sum tú beint nú og kunnu fáa troyst og gagn av at lesa júst títt bræv. Fyrst tað at ikki tora at lata hjartadyrnar upp fyri einum øðrum, tí at ein er svikin av øðrum, og síðan tá ein endiliga letur hjartadyrnar á glopp og bankar á hjartadyrnar hjá einum øðrum, eru kenslurnar hjá viðkomandi longu kólnaðar. Tað er rættiliga vanligt, men tað er eisini rættiliga pínufult. Tað er sjálvandi ymiskt frá fólki til fólk, hvussu skjótt kenslurnar broytast og hvussu stabil fólk eru. Summi eru rættiliga skiftandi, bæði í sinnalag og hvørjar kenslur tey hava fyri sær sjálvum og øðrum. Tað kann hanga saman við, hvussu ein er í javnvág sjálvur, um ein hevur tað gott og hvílir í sær sjálvum, ella um ein altíð er á veg úr onkrum sambandi í eitt annað. Um ein sjálvur hevur trupult við sjálvsáliti og sjálvsmynd, er trupult at hava álit á øðrum og halda, at onnur kunnu elska ein. So til tín spurning um, hvussu tú kemur víðari, kann eg bara mæla tær til at royna at byggja teg sjálva upp, so at tú blívur sterkari og ert meira tilvitað um, at tú sjálv hevur ávirkan á títt samband við teir, sum tú ert saman við. Altso, tá tú næstu ferð merkir, at tú letur teg aftur kensluliga fyri einum drongi, so kanst tú royna at broyta tað spakuliga við at hugsa um, hvat tað er, sum hendir, og at tosa við hann um, hvussu tú ert, so at hann skilir teg og má vera tolin við tær, eins og tú mást vera tolin við honum og hansara veikleikum. Tað besta er at tosa saman um kensluligar forðingar, sum ein kann hava, sjálvt um tað kann vera ringt at tosa um. Tað kann knýta fólk meira saman, men tað kann eisini styggja fólk burtur, sum ikki tora at lata seg upp sjálv.
Góða eydnu við kærleikanum!
Tú & Eg Ráðgevingin
