Góðasta genta, ið verður happað!
Tað er gott, at tú roynir at finna tær hjálp, í tí sváru støðu tú ert í! Happingin av tær í skúlanum kann ikki halda áfram, tað má steðgast og onkur vaksin má taka ábyrgdina og steðga happingini. Tú hevur rætt til at kunna ganga í skúla uttan at óttast, hvat dreingirnir kunnu finna uppá at siga við teg, og tú hevur rætt til at verða viðfarin við virðing. Út frá tí tú fortelur, er støðan í tínum skúla tíverri ein onnur, enn hvat hon átti at verið. Tú sigur, at tú hevur roynt at tosa við dreingirnar, men at teir flenna bara.
Heraklapp frá mær til tín fyri at tú sigur frá, tað er djarvt av tær! Veruleikin er tó tann, at onkur vaksin má taka ábyrgdina og hjálpa tær við at steðga happingini. Tað at tú ert kedd og kennir teg óynskta, eru nátúrligar kenslur at hava, tá ið tú verður happað. Tað er tað sum happingin kann gera við ein, og tí er tað so umráðandi at tað verður steðgað. Tú sigur, at tú hevur mist eina vinkonu, og tað skilji eg væl, at tú eisini ert kedd um. Tað at tú grætur og kennir teg tunglynta, kann eisini vera tí at tú syrgir um vinkonuna. Tú sigur, at tú til tíðir fært hug at skera teg. Eg hugsi, um tað er okkurt sum tær dámar væl at gera, so sum at lurta eftir tólnleiki, hyggja at einum góðum filmi, ella fáa tær eitt heitt bað – bara okkurt sum kann avleiða tankarnar frá tí at tú hevur hug til at skera teg. Um tað er onkur, á tínum aldri ella vaksin, sum tú hevur álit á, so royn at tosa við viðkomandi og fortel teimum, hvussu tú hevur tað. Tað hjálpir at seta orð á tankar og kenslur, tá ið høvdið er við at bresta.
Tú sigur at tú hevur roynt at tosa við foreldrini og lærararnar á skúlanum, men at einki hjálpir. Eg vil heita á teg at vísa teimum hetta brævið og svarið, soleiðis at tey síggja hvussu álvarslig støðan er. Tú kundi eisini víst heilsusystrinum á skúlanum brævið og so kunnu tit møguliga í felag tosa við tíni foreldur ogella lærarar.
Nú má happingin steðgast!
Góða eydnu við tí og skriva, kjatta ella ring endiliga til okkum aftur, um tú hevur hug til tað!
Tú & Eg Ráðgevingin
