Góða genta, sum ikki vilt fara til handan læknan aftur
Læknin hevur nokk skyldu til at upplýsa teg um, at tað ikki er loyvt at fara í song við nøkrum tá ið man er undir 15 ár. Men at upplýsa er ikki tað sama sum at skelda. Tað er sjálvandi ikki rætt av henni, at hon skeldar teg út og næstan hóttir við at melda teg. Hon átti nógv heldur at róst tær fyri, at tú ert so mikið sjálvstøðug, at tú fert til lækna fyri at fáa undirlívskanning. Tað sigur mær, at tú ert ein búgvin genta, sum tekur ábyrgd av tí, tú gert, og sjálvandi átti hon at verið skiljandi og hjálpt tær. Eg skilji væl, at tú verður rasandi av at hon heldur seg kunna fara soleiðis við tær, og vit mugu hopa, at hatta er eitt eindømi, og at tú ikki kemur út fyri tí aftur. Tað ber til at skifta lækna, og tað haldi eg at tú átti at gjørt, eftirsum tú jú mást hava ein lækna, og ikki ætlar tær til hasa aftur. Summir av læknunum eru so upptiknir, at teir ikki taka ímóti fleiri sjúklingum. Men onkur annar man vera til taks, enn handan daman, tú hevur verið hjá. Men tá hetta er sagt, so er tað eisini okkurt við at tá tú bert er 14 ár so kemur tú undir foreldrini hjá tær, tað vil siga, at tú hevur sama lækna sum tey. Men ring til Sjúkrakassan, og spyr, hvussu tú kanst skifta lækna, hvis tú kanst og hevur hug til tað? Tað er tlf.nr. 309500
Um tú ikki kanst skifta lækna, ella okkurt annað hendir, haldi eg at tú átti at tikið eitt prát við læknan hjá tær, kanska saman við mammu ella pápa tínum, har kanst tú greiða henni frá hvussu tú upplivdi støðuna og at hatta ikki er nakað tú vilt finna teg í í framtíðini. Tað kann vera at læknin hjá tær hevur havt ein keðiligan dag handan dagin tú vart har, men hon eigur at vera so mikið at sær komin, at hon ikki letur tað ganga út yvur teg.

Alt tað besta
Tú & Eg Ráðgevingin