Góða Genta!
Alt sum tú greiðir frá í brævinum um hvussu hann er og hvat hann ger, styrkir tína niðurstøðu um, at hann kynsliga er til mannfólk, tað vil siga samkyndur.
Tú hevur trupulleikar av, at hann ikki vil viðganga tað, tá tú spyrt hann. Kanska er hann ikki klárur sjálvur at viðganga tað?? Og kanska er tað torført hjá honum, at hoyra hetta frá tær?? Hóast tað, so haldi eg ikki, at hann skal svar tær soleiðis aftur.
Hetta órógvar teg í skúlanum. Allir tankarnir fara at mala. Tú vilt ikki missa hann, men innast inni veitst tú longu, hvønn veg tað ber. Tú mást gera tær greitt, hóast tað kann vera ringt, at er hann samkyndur, so er hann samkyndur, og tað kanst tú ikki broyta. Men tað kann eisini vera, at hann hevur eitt tíðarskeið nú, har hann heldur, at mannfólk eru spennandi, tað er als ikki vist, at hann um 10 ár livir sum samkyndur og onkursvegna mást tú bara góðtaka, at soleiðis er tað.
Tað er sjálvandi ikki lætt, tá ið tú ert so góð við hann, men um hann er samkyndur, ella hvat hann nú er, so verður hvørgin av tykkum eydnusamur, um tit vera verandi saman soleiðis sum tað er nú. Tú skalt eisini hugsa um, hvar tíni mørk ganga, og hvat tú kanst loyva tær at finna teg í. Tað er ógvuliga umráðandi, at tú lærir teg sjálva at seta mørk á hesum økinum. Hvat finnur tú teg í og hvat finnur tú teg ikki í. Hvat heldur tú er gott og deiligt og hvat kanst tú ikki góðtaka.
Og hinvegin, so mást tú eisini virða, at hann er soleiðis, sum hann er. Tað tekur sjálvandi sína tíð at góðtaka hjá tær, og tú verður noydd at siga við hann, hvussu tú hevur tað við tykkum báðum og tykkara forholdi. Støðan hjá tær er trupul, og um tú hevur tørv á at fáa stuðul og seta fleiri orð á tínar kenslur, kanst tú altíð venda tær aftur til Tú & Eg Ráðgevingina, har tú eisini kanst kjatta ella tosa við okkum.

Vinarliga Tú & Eg Ráðgevingin