Góða tú, ið kallar teg “havi ongan”
Orsaka seina svarið. Tað er ringt at missa ein vin ella vinkonu, sum man er góður við. Í tínum føri er tað serliga ringt, av tí at tú sært hana nærum hvønn dag í skúlanum – men ikki kann vera saman við henni sum vinkona longur.
Hevur tú sagt henni frá, hvussu tú hevur tað, og at tú gjarna vil vera vinkona hennara? Tað er ikki sikkurt at vinarlag tykkara ímillum er tað rætta fyri nakra av tykkum, men eg haldi tað hevði verið eitt gott hugskot um tú tosaði við hana um, hvussu tú hevur tað. Haldi eisini at tú skalt siga við hana, at hon skal lata vera við at baktala teg – tí hetta er eitt slag av happing.
Annars so haldi eg eisini at tú skuldi tosa við ein vaksnan um tína støðu. Tú skrivar sjálv at tú hevur sjálvmorðstankar. Hetta er álvarslig tekin um mistrivnað  – so hetta eigur tú at taka í álvara. Tosa við foreldur tíni, ein lærara ella onkran annan vaksnan, sum tú hevur álit á. Ofta kann tað at tosa um tingini vera nokk til at man fær tað nógv betur.
Eru ongar aðrar gentur í flokkinum ella tætt við har tú býr, sum tú kanst verða saman við? Um tú slettis kann koma í tankar um onkran á tín aldur, sum tú kanst hava sum vinvinkonu, so skalt tú siga tað við flokslærara tín og foreldur tíni.

Góða eydnu framyvir!

Vinarliga
Tú & Eg Ráðgevingin