Halló ‘Hmmmm?genta ‘!
Tú hevur tað gott nokk ikki so stuttligt til dagligt.
Tað allar fyrsta eg hugsi, tá eg lesi títt bræv er, at tú ert ein genta sum onkursvegna hevur eitt yvirskot av kreftum, sum tú kanst brúka til nakað positivt. Bara tað, at tú so væl greiðir frá “hvør tú ert” og “hvør tú ikki ert”, hvat tú vilt og hvat tú ikki vilt, vísir at tú nokk skal klára teg, sjálvt um familjan hjá tær ikki altíð skilir tínar meiningar, og hvat tú hevur tørv á.
Eg skilji væl, at tað ikki er lætt hjá tær, tá tú so ofta verður misskilt av foreldrunum. Onkursvegna hava tey ringt við at seta seg í tína støðu, ringt við at skilja tínar trupulleikar og ringt við at tosa við teg um tínar trupulleikar.
Tað kann vera torført at góðtaka, at onnur fólk ikki eru líka sum ein sjálvur, hugsa og trúgva øðrvísi enn ein sjálvur, og velja at liva uppá ein annan máta enn ein sjálvur. Hetta er kanska serliga ringt tá tað eru børnini hjá einum sum velja at vera øðrvísi. Tíni foreldur eru møguliga bangin fyri, hvat onnur fólk fara at siga um tey, um tey loyva tær at vera tann ið tú sigur tú ert. Fyrr ella seinni vera tey noydd til at góðtaka at tú ert akkurát líka fitt, hóast tú hevur ein annan hugburð um nøkur ting.
Tað sum tú kanst gera í hesi støðuni sum tú ert í, er sostatt ikki at góðtaka at tú verður noydd at liva eitt dupultlív. At mamma tín verður kedd til tíðir er nakað tú nokk verður noydd at liva við, tú ert jú eitt tað dýrabarasta hon eigur. Men ver opin og erlig um hvat tú gert, og hvat tú hugsar. Tað nyttar ikki at smekka við hurðum ella taka tabelettir, tað ger bert støðuna enn fløktari og truplari. Tað verður nokk ringt hjá foreldrunum at skilja at soleiðis ert tú, men eg vænti at tey við tíðini fara at góðtaka at tað er soleiðis tú ert.
Góða eydnu og skriva endiliga inn aftur um tú hevur tørv á tí.
Tú & Eg Ráðgevingin
