Hey og takk fyri spurningin, sum er viðkomandi fyri nógv, ið vilja klænka seg! Tað er heilsubetri at drekka djús enn at drekka vanliga saft, sjálvt um sukurinninhaldið er umleið tað sama. Tó eru vitaminir og mineralir í djúsinum, so tað er vert at velja fram um. Tað verður mælt til ikki at drekka meira enn 1 glas av djúsi um dagin, um ein vil klænka seg. Fun light saftin, sum tú spyrt um, inniheldur eitt søtievni cyclamat, ið er skaðiligt at drekka í stórum mongdum, hóast tað er góðkent søti-evni. Tað er ikki heilsugott at drekka light saft í so stórum mongdum, sum tú annars eigur at drekka av vatni hvønn dag. Tað eru nógv sløg av saft, og summi er heilsubetri enn onnur. Tó vil eg ráða tær til at finna fram til, hvørjar fruktir, ið tær dámar, t.d. appelsin, citrón, grape ella ananas, síðan skera tað í bitar ella skivur og koyra tað í eina vatnkannu, og síðan koyra kalt vatn í, og tá skal tær nokk dáma vatnið, sum fær ein frískan smakk av frukt. Tað er bert neyðugt við einari frukt til hvørja kannu av vatni, so tað er bæði tann bíligasta og heilsubesta loysnin.

Góða eydnu!
Tú & Eg Ráðgevingin