Góða ‘hvat skal eg siga um alt’
Takk fyri brævið. Tað er gott, at tú skrivar til okkum, tí tað eru sanniliga stórir trupulleikar, sum tú stríðist við. Tú sigur, at tú vigar 54 kg, og er 170 cm. Um tú heldur, at tað er ov nógv, hevur tú ikki eina heilt realistiska fatan av kroppinum. Tá man hevur eitt BMI sum er 18, so byrjar man faktiskt at tosa um undirvekt. Tú vilt niður á eitt BMI, sum er 17 ella 16. Tað er sjálvandi alt ov lágt – tað er so lágt, at tað beinleiðis er vandamikið fyri kroppin. Tað kann vera tekin um, at tú ert við at fáa etingarólag. Um man vigur so lítið steðgar kroppurin at mennast og man kann blíva álvarsliga sjúkur og gera stóran skaða á kroppin. Tú kanst lesa meira um etingarólag á heimasíðuni: www.spiseforstyrrelser.dk

Tú skrivar eisini at tú heldur teg vera ljóta og vemmiliga. Tá man hevur tað sum tú, heldur man ofta, at man er tjúkkur hóast man í verunleikanum ikki er tað. Tað at tú skerir teg, sigur eisini nakað um at tú hevur tað ringt. Tað at tú hevur tekin uppá etingarólag og at tú skerir teg kann verða tekin uppá at tú hevur sálarligar trupulleikar, og at tú tí skalt hava hjálp sum skjótast. Er tað ikki onkur vaksin sum tú kanst tosa við um hesi viðurskifti, t.d. onkur í familjuni? Tí tað er sera umráðandi at tú fært hjálp til at steðga hesum sum skjótast. Tú kanst eisini fara beinleiðis til læknan við tínum spurningum.

Tú skrivar eisini at foreldur tíni eru fitt, men eru súr og skelda teg. Tú sigur, at tú gert nógv í húsinum, men at mamma tín sær tað ikki. Kanska skuldi tú roynt at tosa hampuliga við foreldur tíni um hetta – siga við tey, at tú ert kedd av at tað er soleiðis.Um tað er ov torført, kundi tú kanska víst henni brævið, sum tú hevur skrivað til okkum, har tú greiðir sera gott frá tínari støðu.

Heilsan
Tú & Eg Ráðgevingin