ey tú, ið ivast í, hvussu tú skalt gera!
Hatta er ein trupul støða, ið tú ert komin í. Tú mást venja teg við tankan um at tú mást verða meira erlig við tín vinmann um, hvussu tú hevur tað við tykkara sambandi. Tað, at hann ynskir at vera meira enn ein vinur við teg, kann ikki noyða teg at føla tað sama fyri honum. Hann hevur tað trupult og vísir tær, at hann blívur keddur, tá tú ert saman við øðrum dreingjum ella vísir áhuga fyri øðrum dreingjum. Tað er so hansara máti at reagera uppá, men tað kann ikki forða tær í at gera tað, sum tú ynskir. Tú mást gera honum greitt, at tað ikki kann halda áfram soleiðis, tí tað ávirkar eisini teg negativt, at hann blívur illur og keddur, og at tú hevur ringa samvitsku. Tykkara vinarlag er nokk ikki serliga uppbyggjandi í løtuni, so tú kanst byrja við at tosa um tað, og hvørjar møguleikar, ið tit hava at halda áfram sum vinir í framtíðini. Um tit skulu halda áfram at vera vinir, má hann góðtaka, at tú ikki hevur aðrar kenslur fyri honum enn sum vinfólk. Um hann klárar at góðtaka tað, verður hann noyddur eisini at tola at síggja teg saman við øðrum. Tú kanst vísa á teir eginleikar við honum, ið tær dámar, og siga við hann, at tú ert glað fyri hann sum vinmann, um tú veruliga ert tað. Um tú ikki ert glað fyri tykkara vinarlag longur, kanst tú tosa við hann um, hvussu hansara atburður hevur broytt tykkara vinarlag, og um tit kunnu gera nakað fyri at bøta um tað. Tú kanst eisini kjatta við okkum um tíni ivamál.
Bestu heilsur Tú & Eg Ráðgevingin
