Góða genta!
Tá eg lesi títt bræv, fái eg eina mynd av einari gentu, ið skal hava hjálp frá øðrum skjótast til ber til antin at fara úr parlagnum ella at gera broytingar í parlagnum.. Fyri tað fyrsta ert tú í einum parlagi við ein nógv eldri drong, ið tú hevur kynsliga samveru við, og tað hava tit gjørt leingi, sjálvt um tað ikki er loyvt, og hann kann revsast fyri at hava kynsliga samveru við teg, tá tú ert yngri enn 15 ár. Tú sigur, at hann er penur og lekkur, men tá hugsi eg, at hann ikki ljóðar at vera fittur og góður móti tær. At hava ein eldri, penan og lekran sjeik kann ljóða gott, men hansara kærleiki til tín er altavgerandi, um tit kunnu fáa eina góða nútíð og framtíð saman. Tú ert bangin fyri tínum sjeiki, og tað er ikki í lagi. Tú verður noydd at verja teg móti honum, við hjálp frá øðrum, t.d vinkonum og foreldrunum um neyðugt. Eg veit ikki, um tú ert til reiðar at fara frá honum, men tú verður noydd at tosa við hann um, hvat tú vilt og hvat tú ikki vilt. Tú kanst velja tær eitt trygt stað og eitt hóskandi tíðspunkt at gera tað. Um tú hevur brúk fyri at kjatta ella tosa við okkum um tína støðu, kanst tú venda tær til Tú & Eg Ráðgevingina aftur. Vit vilja fegin hjálpa tær!

Ansa væl eftir tær!
Tú & Eg Ráðgevingin