Hey MCR!
Soleiðis sum eg skilji brævið hjá tær, so hevur tú funnið dreymasjeikin, sum tú droymir um, tá ið tú lurtar eftir “My Chemical Romance” og tá tú gongur túrar. Afturat hesum hevur tú ein sjeik.
Tú greiðir frá, hvussu tú følir fyri tínum sjeiki, tá hann er hjá tær, men at tú eisini hugsar um hin, tá tú ert saman við tínum sjeiki.
Soleiðis sum eg skilji títt bræv, so ert tú í iva, um tað er í lagi at hava sovorðnar kenslur fyri einum dreymasjeiki. Tú hevur ringa samvitsku um tað, men royn at hugsa um, hvat tað er við tínum dreymasjeiki, sum er so deiligt, at tað hjálpar tær, tá tú gevur tær sjálvari frí frá dagsins trupulleikum. Kanska er tað gott hjá tær at hava ein dreym, sum tú kanst droyma, tá tú hevur brúk fyri tí. Tað er í øllum førum einki galið við at hava dreymar og fantasiir.
Tú hevur rætt at droyma um akkurát tann sjeik, sum tú vilt, tað hendir einki við tí. Men í veruliga lívinum er ongin feilfríur. Tú hevur eisini rætt at velja, hvønn sjeik, ið tú ynskir at liva saman við. Tað er bara tú sjálv sum veitst, hvønn tú dámar best.
At hava lívligt hugflog og dreymar er heilt nátúrligt. Samstundis er ikki altíð so lætt at stýra, hvat ein hugsar og droymir um. Tú kanst brúka hugflogið og droyma við góðari samvitsku, tí tað er títt, og ongin annar kann taka tað frá tær.
Tú kanst altíð skriva aftur til okkara, um tú ikki heldur, at eg havi skilt tín trupulleika rætt.

Blíðar heilsur

Tú & Eg Ráðgevingin