Spurnarkassin: Genta, 15 ár spyr

Mistankar um at hann er ótrúgvur.

Spurningur:

Eg havi ein sjeik, sum er 20 ár. Vit hava verið saman næstan 3 vikur. Fyri nøkrum døgum síðani fór hann til skips. Hann skal vera vekk í 6 vikur. Hann hevur sagt at hann elskar meg for nógv til at vera ótrúgvur og hann hugdi í míni eygu tá hann segði tað. Umborð er fult av konufólki, eg eri so bangin fyri at hann verður ótrúgvur, tí eg veit ikki um hann klárar at halda sær í 6 vikur. Hann sigur at hann sjálvandi ikki fer at vera ótrúgvur og at hann klárar at halda sær. Men eg veit ikki ordiliga um hann klárar at halda sær so leingi. Hví eg haldi tað, er tí at hann hevur havt eitt ógvuliga vilt lív áðrenn hann møtti mær. Hann fór ofta í ball, roykti hash, var í song við 10 gentum og Gud viti hvat meir. Nú sigur hann, at nú hevur hann fingið eitt ordiligt lív tí hann møtti mær og at hann ongantíð hevur elskað eina gentu so nógv sum meg. Hann elskar meg virkuliga aftaná alt tað sum hann hevur sagt, og um ein drongur ger mær nakað, so verður hann bukaður niður av sjeikinum. Og eg stóli uppá hann, men tað er ringt tá man veit at man ikki sær hvønn annan í vikur, og at hann er við øðrum konufólkum. Hvat um hann missir kenslurnar fyri mær? Eg blívi við at tonkja uppá tað....!

Svar:

Góða tú!
Tú sigur í brævinum, at tú hevur verið saman við sjeikinum í tríggjar vikur… tí er tað kanska ikki so løgið, at tú ert ósikkur í hvat hann ger umborð. Samstundis sum tú ert ósikkur í hvat hann kann finna uppá, so sigur tú at tú stólar uppá hann. So tað er kanska eitt sindur blandaðar kenslur tú gongur við… at tú viðhvørt hevur álit á at hann ikki ger nakað við øðrum konufólki, og at tú viðhvørt ert ótrygg. Tað at har eru onnur konufólk umborð á skipinum, tað er nakað tú mást góðtaka. Tú ert jú eisini kring mannfólk á landi. Munurin er ikki so stórur. Óansæð hvar tit eru stødd, so eru fólk kring tykkum av hinum kyninum. Tit mugu royna at stóla uppá hvønn annan, og at vera hvørjum øðrum trúgv, um tit framhaldandi vilja vera saman.
Tú sigur eisini, at tú ert bangin fyri um hann missir kenslurnar fyri tær. Tað er keðiligt at tú ert bangin, men tú kanst ikki gera nakað fyri at stýra um ein persónur missir kenslurnar fyri tær ella ikki. Ein og hvør kann missa kenslurnar fyri einum persóni, óansæð hvar persónurin arbeiðir. Hetta er nakað tú noyðist at góðtaka. Men vónandi fer hetta ikki at henda fyri tykkum. Tað sum tú hevur at taka útgangsstøði í, er at hann sigur at hann elskar teg. Eg rokni eisini við, at tú hevði merkt tað, um hann ikki var góður við teg.
Eg veit væl at tað er ringt, men eg haldi at tú skal takað ta sum tað kemur og gleðast um sjeikin, og gleða teg til hann kemur aftur.
Eg rokni eisini við, at við tíðini, sum tú lærir hann betri at kenna, so fert tú vónandi at kenna teg tryggari, og kanska betri vita hvar tú hevur hann.

Alt tað besta,

Tú & Eg Ráðgevingin