Hey tú við dulnevninum No clue!
Tað eru nøkur fólk, sum altíð átaka sær skuldina fyri alt møguligt, og tað er ein stórur trupulleiki at hava at dragast við. Í familjum, har onkur av teimum nærmastu hevur trupulleikar við at rúsa seg, er tað vanligt, at tey, sum eru rundanum, fáa skuldarkenslur og hugsa um, hvat man kundi gjørt, so at hetta ikki var hent. Út frá brævi tínum kann eg vissa teg í, at tú eigur ikki lut í, hvussu beiggi tín hevur livað lívið. Vit fáa øll nøkur evnir ( talentir ) við inn í lívið, men summi steðga upp eina tíð á vegnum gjøgnum lívið. Nógv kenna eina tíð ein tómleika innan í sær. Tey fylla so t.d. innvendiga holið við rúsevni ogella rúsdrekka. Nógvum eydnast tó at finna vegin aftur, og koma víðari, soleiðis sum tað hevur eydnast beiggja tínum. Tað er veruliga nakað at gleðast um.

Góða tú, hasar tankarnar mást tú royna av øllum alvi at sleppa tær av við! Tú ert vælkomin at ringja ella kjatta við okkum á Tú & Eg Ráðgevingini. Tað er lættari at samskifta á tann hátt enn bara einvegis, sum eitt bræv jú er.

Vinarliga Tú & Eg Ráðgevingin