Tú skrivar, at tú fært skuldina fyri alt sjálvt um tú onki gert. Tað ljóðar ikki rætt, og tað eigur tú at tosa við læraran um. Um tað ikki hjálpir, eigur tú at tosa við foreldur tíni um tað, og so fáa tey at hjálpa tær at tosa við læraran.
Men tú spyrt hvør skal døma ella meta um eitt barn hevur atferðartrupulleikar. Um tað er eitt skúlabarn skal lærarin tosa við foreldrini um trupulleikan, síðani setur lærarin seg í samband við Sernámsdepilin, sum so arbeiðir víðari við málinum. Á Sernámsdeplinum starvast fólk, sum hava serligt skil fyri slíkum, tað eru lærarar við serútbúgving, námsfrøðingar ella sálarfrøðingar. Lærarin í skúlanum kann eisini tosa við heilsusystrina á skúlanum ella kanska Barnaverndartænastuna. So tú sært, at tað ongantíð er lærarin einsamallur, sum ger av, um eitt barn hevur atferðartrupulleikar.

Vinarliga
Tú & Eg Ráðgevingin