Hey hey!
Eg vil byrja at svara tær við at siga við teg, at tað er ógvuliga ymsar reaktiónir uppá kynsligan ágang, so vit eru varin við at koma við útsagnum um, hvat er vanligt og óvanligt. Tað er gleðiligt, at tú kanst liva eitt gott lív í dag, hóast tú hevur verið fyri kynsligum ágangi sum barn. Tað er eisini í lagi, at tú hevur blandaðar kenslur fyri hesum manni. Tær kenslur og reaktiónir, ið tú hevði sum barn og tannáringur, í samband við kynsliga ágangin, kanst tú ikki broyta nú, tí hent er hent, og ikki nyttar tær at fáa skuldarkenslur um tað, sum tú føldi tá. Eg vil ráða tær til at venda tær til aðrar felagsskapir og ráðgevingar, ið eru serliga ætlaðar vaksnum, ið hava verið fyri kynsligum ágangi, um tú hevur tørv á at arbeiða meira við tínum kenslum í sambandi við kynsliga ágangin.
Okkara ráðgeving er bert ætlað børnum og ungum, og velja vit tí at vísa tykkum vaksnu á aðrar ráðgevingar, og har eru rættiliga nógvar at velja í. Tú kanst lesa meira um viðkomandi heimasíður og kunnandi tilfar, undir Eg og lívið á hesi heimasíðuni.
Bestu heilsur
Tú & Eg Ráðgevingin
Menu
