Góða Diddan !
Ja, hatta eru rættuliga stórir trupulleikar, ið tú hevur havt og enn hevur at dragast við. Eg fari at byrja við at biðja teg ringja ella kjatta við okkum. Tað er mangan sera trupult at svara so álvarsligum brøvum, tí tá er tað bert einvegis, og vit fáa ikki sett tær spurningar og samskift meira beinleiðis. Tú hevur longu verið mamma fyri tíni systkin í so mong ár, so tú hevur longu góða venjing í at ansa eftir øðrum og geva øðrum umsorgan. Eg vóni, at tú hevur havt onkran góðan, sum hevur givið tær kærleika og umsorgan. Tað treingir tú til. Tú sigur, at Barnaverndartænastan hevur verið og tikið tíni systkin. So hevur onkur lagt merki til tína støðu og støðuna heima. – Hetta eru børn hjá tínum foreldrum, og nú er so Barnaverndartænastan komin í tøkum tíma, og hevur roynt at hjálpt tínum systkinum. Eg hugsi, um tú tosaði við Barnavernndartænastuna tá, og um tey góvu tær nakað lyfti um hjálp, tá tú eisini hevur rætt til at hava eitt trygt lív. Tá tú sigur, at tú ert á ein hátt flutt frá tínari familju, fær tað meg at hugsa, um tú kanska ert farin at búgva hjá fosturfamilju, og at Barnaverndartænastan er í ferð við at hjálpa tær, men tað sigur tú ikki beinleiðis.
Vónandi fara foreldur tíni at søkja sær hjálp fyri teirra alkoholtrupulleikar. Fyri at nevna nøkur ókeypis tilboð, so er Blái Krossur og Heilbrigdi, sum veita viðgerð til fólk við slíkum trupulleikum. Tú kanst ikki áhaldandi taka tær av tínum systkjum, soleiðis, sum tað hevur verið. Tú greiðir so væl frá, hvussu góð tú ert við tey, og eisini hvussu krevjandi tað er fyri teg, serliga tá tú sært, hvussu ringt tey hava tað. Sjálvandi ert tú góð við tey, men tú kanst ikki vera mamma teirra. Tað er púra vanligt at børn, ið vaksa upp í familjum við alkoholtrupuleikum, taka sær ov nógv av systkjum og foreldrum. Tað er hinvegin sera skaðiligt fyri teg at taka so stóra ábyrgd fyri øðrum, tí tú setur tíni egnu ynskir og egna tørv til síðis fyri at hjálpa øðrum, og tú hevur tey altíð í tonkunum, og fært ikki slept. Tað kann koma at merkja teg restina av lívinum, um tú ikki sum skjótast fært hjálp til at sleppa ábyrgdini, so at onnur vaksin taka ábyrgdina frá tær. Tað er skuldarkenslan og ringa samvitskan, sum eru ring at sleppa sær av við, men tað ber til, um tú fært hjálp t.d. frá einum alkoholráðgeva, sálarfrøðingi ella øðrum viðgera, ið hjálpa avvarðandi hjá alkoholikarum. At seta orð á tínar kenslur og at tú veitst, at tú fært hjálp, kann eisini hjálpa tær á aðrar tankar, tá tú hevur tørv á at skera teg ella hevur sjálvmorðstankar.
Tú kanst lesa meira um, tá foreldur drekka ov nógv undir Eg og Lívið, og vit vísa eisini víðari til viðkomandi heimasíður, t.d. www.blakross.fo og www.hope.dk
Men so aftur til tín. Tú mást leita tær hjálp, um tú ikki fært nøktandi hjálp nú. Tá tú ert 16 ár, hevur Barnaverndartænastan eins skyldu at hjálpa tær sum tínum yngru systkinum. Tit eiga saman at finna út av, hvat tú hevur brúk fyri av hjálp og stuðli, so at tú kanst fáa eitt so gott lív sum gjørligt. Nú er tíðin komin, har tú skalt hava tað gott og fáa møguleika til skjótt at byrja títt vaksna lív, soleiðis sum tú sjálv ynskir tað. Tú hevur helst dreymar um útbúgving, arbeiði, at ferðast, at fáa tær eitt trygt stað at búgva, ja alt sum onnur ung eisini ynskja sær.
Viðvíkjandi tíni hjartasorg um fyrrverandi sjeikin, greiðir tú so væl frá, hvussu saknurin eftir honum kennist, bæði meðan tú ert vakin og tá tú svevur. Ikki løgið, at tú saknar hansara umsorgan fyri tær. Tú sigur annars einki um, hvat var orsøkin til at tað endaði millum tykkum, og hví hann ikki vil tosa við teg. Tað kann eisini fara at hava góða ávirkan á teg og títt kærleikslív, um tú fært hjálp fyri trupulleikarnar, ið tú hevur í familjuni. Tað kann vera trupult at vera í einum parlagi, tá ein altíð skal hugsa um, hvussu øll onnur hava tað. Tá kann vera trupult at stuttleika sær og njóta at vera saman við makanum, tí ein verður nógv órógvaður av stúran. Einaferð enn vil eg mæla tær til at ringja til okkum, so at tú betri fært greitt frá tíni truplu støðu, og fært helst meira burturúr ráðgevingini frá okkum.
Ansa nú væl eftir tær!
Bestu heilsur Tú & Eg Ráðgevingin
