Góða tú!

Tað má verða ein ræðandi kensla at hugsa, at ein gongur við einum deyðum barni. Haldi ikki, at vinkonurnar hava hugsað um, at tað, sum tær søgdu í skemti, fór at gera teg so stúrandi. Tó so haldi eg ikki, at tú skalt stúra fyri hesum, tá graviditetsroyndin var negativ. Kroppurin plagar at gera vart við tað á annan hátt, við at man t.d. fær fepur ella fær pínu í undirlívið og búkin. Tú sigur, at um ein hyggur at tær, so kundi ein kanska trúð, at tú gekst við einum deyðum barni, men eg skilji ikki heilt, hvat tú meinar við. Er tað tí, at tú hevur fingið størri búk ella hvør er orsøkin til at tú heldur, at fólk kundu sæð tað á tær? Tað besta er altíð at venda sær til læknan við slíkum spurningum, tí hann fær kannað teg fyri tað, sum tú ivast í, so tað er eisini mítt besta ráð í hesum føri.

Tú sigur, at mánasjúkan gjørdist óreglulig í summarferiuni. Mánasjúkan kann verða ávirkað av fleiri ymiskum orsøkum. Kostur, strongd, vekt, sorg, eru bert nøkur dømi, ið kunnu ávirka mánasjúkuna. Tá ein fer í summarfrí, kemur eisini broyting í gerandisdagin. Ein svevur kanska longri enn vanligt og etur kanska ikki tað sama, sum ein plagar. Hetta kann vera við til at gera mánasjúkuna óregluliga. Hetta eru tó alt gitingar, og eg vil mæla tær til at fara til læknan við hesum spurningi eisini, tí hann fær spurt teg um alt, ið hann hevur tørv á at vita fyri at geva tær eitt rætt svar.

Tú sigur, at tú hevur verið í song við onkrum nakrar ferðir. Nú veit eg ikki, um tit nýttu fyribyrging, men tað fari eg at minna teg á at gera. Minst til at hýtin er ein góð fyribyrging, tí hon verjir fyri bæði kynssjúkum og fyri at tú ikki gerst við barn.

Tú er vælkomin at venda tær aftur til ráðgevingina, um tað er eitthvørt, ið tú hevur uppá hjarta.

Vinarliga Tú & Eg Ráðgevingin