Góða genta.
Tú ert vælkomin at skriva inn til okkara við einum hvørjum trupuleika ella spurningi. Vit eru her til tað sama og ynskja at hjálpa.
Tað ljóðar sum tú hevur havt eina traumatiska uppliving í svimjihylinum í Havn fyri nøkrum árum síðani, og hetta hevur gjørt, at tú nú ikki torir í vatn. Tá ein upplivir eina vandamikla støðu, ið hóttir tilveruna hjá einum, sum tað tú hevur verið úti fyri jú ger, so kann hetta lagra seg sum eina traumatiska hending, sum sinni og kroppurin minnist.
Hetta kann fáa avleiðingar, so at tá ein aftur nærkast tí støðuni ella bert eini støðu, ið kanska líkist hinari, so reagerar kroppurin við at fyrireika seg til nakað, ið hann heldur er vandamiki. Hetta er tað, ið hendir, tá tú skalt í vatn: tú gerst bangin, tínir tankar byrja at koyra í høvdinum, tú ristist, fær hjartabankan og marruna. Orsøkin til, at kroppurin reagerer soleiðis er tí hendan hendingin hevur gjørt, at kroppurin minnist hana sum vandamikla og hann vil fegin ávara teg um, at tú ert í vanda. Hetta er sera hent, um ein veruliga er í vanda og ein hættur hjá menniskjanum at yvirliva uppá, men tá óttin byrjar at fáa vald á einum og tá hann spreiðir seg til støður, ið als ikki eru vandamiklar, so forðar tað fyri, at ein kann gera tey tingini, ið ein ynskir, sum t.d., tá tú bleiv tilnevnd at loypa á sjógv ella sum nú, tá óttin forðar fyri, at tú kanst útliva dreym tín um at arbeiða umborð á Nørruni.
Hetta er sjálvsagt keðiligt, men tað er óført, at tú ynskir at gera nakað við tað, tí tað ber til at koma av við slíkan ótta. Ein sálarfrøðingur, ið hevur sera góðar royndir innan arbeiði við ótta og sum eg hugsi kundi hjálpt tær, er Kristian Eli Andersen. Hann er lærdur innan metakognitiva terapi, ið hevur víst seg at vera virkin til viðgerð av ótta. Tú kanst lesa meira um hvussu hann arbeiðir her: a “http:metakognitiv.fosoleidis-arbeidi-eg”>http:metakognitiv.fosoleidis-arbeidi-ega> .
Metir tú, at hetta er nakað fyri teg og ynskir tú eina tíð, kanst tú ringja á tlf. 218285. Er hetta ikki nakað fyri teg, so finnir tú eisini aðrar sálarfrøðingar á a “http:www.psykologstodin.comcontact.html”>http:www.psykologstodin.comcontact.htmla> .
Vinarliga
Tú & Eg Ráðgevingin.