Góða Scooby Doo!
Gott at tú skrivar til okkara. Tað munnu vera nógv, ið eru í somu støðu sum tú, og ikki vita, hvussu tey skulu gera og vera. Tú gert tær nógvar tankar um tína støðu og tín seksualitet. Tað er gott, at tú longu er tilvitað um, hvørjar støður tú ikki vilt koma í. Tá tú ert ung og ert í menning enn, bæði kynsliga og persónliga, ber ikki til at siga hjá øðrum enn tær sjálvari so við og við at finna út av, hvat tú ert. Tú hevur sjálv trupult við at finna tín seksualitet nú, og tað er púra vanligt fyri fólk í tínum aldri. Seksualiteturin mennist nógv og tað eru nógvar nýggjar kenslur, ið ein skal fyrihalda seg til, tá ein er ungur, eisini í 20unum, og tað kemur eisini fyri, at fólk ikki finna seg til rættis í sínum seksualiteti fyrr enn tey eru 30 ár og eldri.
Tín seksualitetur er ein privatsøk, sum tú ikki ert noydd til at deila við onnur. Harvið meini eg, at tað ikki er nøkur skylda hjá nøkrum at tosa við onnur enn møguliga ein partnara, um hvat ein tendrar uppá og ikki. Tað, sum er mest umráðandi er, at ein ikki ger seg inn á onnur móti teirra vilja. Hvat annað so hendir millum vaksin fólk( tvey, tvær ella tveir) er privat og kemur ikki øðrum við. Øll hava rættindi, og øll hava rætt at verða líka nógv vird, líkamikið um ein er hetero, homo, bi ella trans. Ein onnur søk er, at fólk, ið onkursvegna eru øðrvísi, fáa tað truplari við at liva sítt lív í friði og virðing, og tað er sjálvandi tungt at hugsa um hjá tær. Tú hevur helst kjakast við fólk um tað at vera samkyndur og har hevur tú møtt fordómunum, ið summi hava mótvegis samkyndum. Tú kanst stríðast við at geva teimum størri vitan um tað ella vísa teimum inn á onkrar viðkomandi heimasíður sum t.d. www.sexogsamfund.dk , www.lbl.dk og www.rfsl.se. Hesar síður kunnu bæði hjálpa tær og øðrum, ið ivast, og tær kunnu eisini geva fólki vitan um hetero-homo-bi og transseksualitet. Haraftrat hava tey ráðgeving, bæði av ungum og serfrøðingum.
Um tú hevur tørv á at kjatta ella tosa við okkum, ert tú hjartaliga vælkomin.
Alt tað besta!
Tú & Eg Ráðgevingin
