Góða tú sum skrivar til skríggjar eftir hjálp!
Tað er gott at tú hevur valt at skriva inn til okkara og gera vart við tykkara liviumstøður heima. Soleiðis sum pápi tín fer við tykkum er nakað sum tit als ikki skullu finna tykkum í. Øll hava rætt til at liva trygt og gott og foreldur eiga at verja og elska síni børn.
Tað at tú dugir at siga tína meining er ein styrki fyri teg, og tað er als ikki nakar trupulleiki. Summi foreldur hava ringt við at góðtaka, at børn ella ung svara aftur og blíva lætt provokeraði av tí. Tað sær út sum at pápi tín ikki dugir at skilja at tú ert 15 ár og hevur rætt til at hava – og siga tína egnu meining. Tað hava øll – bæði børn og vaksin!
Eg hugsi eisini um hvussu forholdið hjá tær er við systkini hjá tær, um tit tosa saman um hvussu tit verða viðfarin av pápa tykkara?
Eg veit ikki um tit hava roynt í felag at tosa við foreldrini, um at tit ikki finna tykkum í at verða sligin og rópt at. Tit hava krav uppá at vera hoyrd og vird. Eitt sum er umráðandi tá man tosar saman, er at duga at lurta og geva pláss fyri øllum meiningum.
Tað kann vera trupult hjá tykkum systkjum at sita einsamøll yvirfyri foreldrum, tí er ein møguleiki, sum vit eisini hava nevnt í svarinum hjá ”Skríggjar eftir hjálp”, og tað er at tú kann seta teg í samband við barnaverndartænastuna í tínum øki. Har sita ráðgevar sum fegin vilja lurta og stuðla tær. Tú kanst fara inn á heimasíðuni hjá barnaverndarstovuni www.bvs.fo, har finnur tú bæði telefonnummarið hjá barnarverdarstovuni og hjá barnaverndartænastuni har sum tú býrt.
Til seinast vil eg siga, at eg haldi tað er ógvuliga flott av tær at vera komin ígjøgnum skúlan, hóast tú hevur skula klára teg sjálva, og hóast tað hevur havt nakrar fylgjur.
Tú mást endiliga skriva, ringja ella kjatta aftur til okkara, um tú hevur tørv á tí.

Alt tað besta
Tú & Eg Ráðgevingin