Hey tú við dulnevninum Snorkil!
Tú ert bert 14 og vilt helst fara i song við sjeikinum uttan hýt, tí tað kennist túsund ferðir betur. Gott at tú gjarna vil hava p-bollar, tí tú hevur brúk fyri tryggari fyribyrging, tá tú hevur fastan sjeik. Eg skal kunna teg um, at tann kynsligi lágaldurin er 15 ár, og tað merkir, at tað er revsivert hjá einum, sum er 15 ár og eldri, at hava kynsliga samveru við teg, tí tú ert undir 15 ár. Tað er eingin føst regla um, hvussu læknar gera, tá gentur undir 15 ár venda sær til læknan fyri at fáa fyribyrging, so kanska er best, um tú fert til heilsufrøðingin í skúlanum, sum kann hjálpa tær at venda tær til tín lækna. Hon kann eisini tosa við mammu tína um, hvussu støðan hjá  tær er beint nú og kann vegleiða mammu tína í, hvussu hon skal stuðla tær. Um tað eru 2 ár síðan, at tú fekk mánasjúku, vilja flestu læknar geva tær p-bollar. Um tað bert er eitt ár síðan, vilja summir læknar ivast í, um tað er gott fyri tín kropp og kanska geva tær mini p-bollar, sum ávirka kroppin minni og er líka trygt sum hít, men minni trygt enn vanligir p-bollar. Men undir øllum umstøðum er tað betur at fáa p-bollar enn at gerast við barn so ung. Eitt annað er at p-bollar ikki fyribyrgja  bruna í undirlívinum, so um tú fær ein annan sjeik, mást tú brúka hít aftur. Og minst eisini til, at angribollin kann keypast uttan resept á Apotekinum og skal takast so skjótt sum møguligt aftaná samlegu, um tað er vandi fyri, at tú ert vorðin við barn. Tú skalt ikki stúra fyri at fara til læknan, tí  hannhon vil bert tryggja sær, at tú tolir p-bollar, at tú ikki hevur lyndi til nakrar sjukur, har ikki ber til at taka p-bollar. Tú fært ikki gjørt undirlívs kanning  til fyrstu viðtalu.

Góða eydnu! Tú & Eg Ráðgevingin