Hey góða “forelskaða genta”
Tað er deiligt at vera forelskaður!! :o) Men tað er ikki lætt at vera forelskaður, um man ikki veit, um tann, man er forelskaður í, dámar ein.

Tá vit eru forelskaði, eru vit ofta ósikkur, ivast og halda kanska, at tann, vit eru forelskaði í, ikki leggur nakað í okkum. Men tú kanst hugsa um, hvussu hann er ímóti tær… er hann vinarligur, hyggur hann eftir tær, lurtar hann, tá tú tosar?

Tað er heilt nátúrligt, at vit hava hug at nema við tann, vit eru forelskaði í. Tú sigur, at tú hevur hug at nema við hann, men eg gangi út frá, at tað gert tú ikki, tí tað er ikki tað, man ger fyrst.

Tá tit nú ganga í sama flokki, so síggjast tit næstan hvønn dag. So tað skuldi verið lætt at komið í samband við hann. Tú kanst royna at tosa við hann, vita um tit hava felags áhugamál – tað kann vera filmar, kanska tit halda við sama fótbóltliði ella hondbóltsliði, bøkur ella annað.

Eg veit, at tað kann vera trupult at vera nátúrligur, tá man er forelskaður, men royn og tosa nátúrliga við hann. Á tann hátt kanst tú lodda dýpið, um hann nú dámar teg.

Tú kundi eisini fingið eina góða vinkonu at hjálpt tær at vita, um hann dámar teg. Tú kundi biðið hana hugt, um hann hyggur eftir tær, ella hon kundi sagt okkurt pent um teg, tá tú ikki ert til staðar og vita, hvat hann sigur :o)

Man verður øgiliga keddur, um forelskilsið ikki er afturlønt, men so skalt tú bara hugsa um, at tað eru nógvir fittir dreingir til, og at tú heilt sikkurt einaferð fert at finna ein, tú verður forelskað í og sum eisini er forelskaður í tær!

Vónandi finnur tú skjótt útav, um hann dámar teg :o)

Blíðar heilsur,

Tú & Eg Ráðgevingin