Góða ólukkuliga!
Tann fyrsta tíðin aftaná, at man hevur møtt einum sjeiki og bara er so forelskaður, hevur man ikki so nógv yvirskot ella áhuga til nakað annað, tí tað fyllir so nógv í einum. Tað er eisini í ordan. Tað uppliva ivaleyst øll rundan um teg, og kanska serliga tín góða vinkona. Tit báðar hava havt nógv saman, og nú er ein komin ímillum tykkum. Tað er kanska ringt hjá vinkonuni at skilja, og at góðtaka, men tað verður hon noydd til. Eg haldi, at tú hevur tikið tað sera skilagott, tú hevur tosað við hana, og tú hevur verið í býnum saman við henni og enntá tikið eina pausu frá sjeikinum. Annað kanst tú næstan ikki gera. Tú ljóðar eisini sera skilagóð, tá tú skrivar, at tú ikki vil hava, at hon skal pressa teg at fara í song við dronginum. Tú skalt sjálvandi ikki fara í song við dronginum fyrr enn tú sjálv følir teg til reiðar og hevur hug til tað, tað skal tú standa fast við.
Tað tú kanst gera er framhaldandi at greiða vinkonuni frá, at sjálvt um tú ert góð við og forelskað í sjeikinum, so ert tú eisini góð við hana og ynskir at tit skulu vera vinkonur. Um tað ikki riggar, so kanst tú bíða eina tíð, og vita um hon ikki venur seg við tankan um at tú eisini hevur ein sjeik, og skilir, at tú ikki svíkir hana av tí grund. Tú kanst jú saktans hava ein sjeik samstundis sum tú hevur vinkonur. Tað krevur bara at man gevur sær tíð til bæði.
Tú skrivar eisini, at tú ert byrjað at pynta teg meira nú, og ivast í hvat onnur halda um hetta. Til tað vil eg siga, at tað besta hevði verið, um tú tók støðu í tær sjálvari, og ikki í hvat tú heldur at øll hini hugsa.
Tú skrivar um fleiri ymisk ting í brævinum, og sigur eisini at tú ert broytt so nógv, og at tú ert kedd. Man broytist nógv, tá man er á tínum aldri, bæði kropsliga og sálarliga, og tað kann gera, at man er bæði glaður og keddur hvørt um annað, og at man ikki rættiliga hevur stýr á tingunum altíð. Tú nevnir fleiri ting í brævinum sum ávirka teg, men sigur ikki beinleiðis hvat tað er sum ger teg kedda. Royn at hugsa um tað – hvat tað er sum ger teg kedda, og hvat tað er sum ger at tú ert broytt.
At finna útav hvat tað er sum ger at man er keddur, er fyrsta stigið til at fáa tað betri.
Alt tað besta!
Tú & Eg Ráðgevingin
