Góða Tjaldur!
Takk fyri brævið. Tað er deiligt at hoyra at tær dámar brævkassan. Fyri at taka uppá í vekt, kanst tú royna at eta kost, ið inniheldur heilsugott feitt, t.d. nøtur, oljur, avocado og annars vanligan mat. Tú sigur, at tú gerst ongan ítrótt. Tað er altíð gott at røra seg. Um tú íðkar ítrótt fært tú vøddar. Vøddar viga nógv og gera eisini sítt til at vektin økist. Um tú t.d. fert í gongd við styrkivenjing í eini fitness-miðstøð, kanst tú fáa vegleiðing í, hvussu tú kanst venja fyri at taka uppá í vekt. Tey hava eisini kostráð til tín.
Tú sigur, at tú skalt flyta niður til pápa tín um 2 mánaðir. Eg gangi út frá, at mamma og pápi tín ikki eru saman. Tú nevnir einki um, hvat fyri trupuleikar, ið tú hevur at stríðast við. Men tú sigur, at tú viðhvørt hevur hug at taka lívið av tær og hevur enntá skrivað sjálvmorðsbrøv. Tú hevur avgjørt tørv á at tosa við ein vaksnan um tínar trupuleikar, og tað ljóðar sum eitt sera gott hugskot at tosa við flokslæraran hjá tær. Tín flokslærari  hevur skyldu til at tosa við tann av tínum foreldrum, ið hevur foreldramyndugleikan, um hon metir, at talan eru álvarsligir trupulleikar, ið tú skalt hava hjálp til. Tíni foreldur hava ábyrgd av, at tú hevur tað gott, og tí skulu tey eisini kunnast um tínar trupulleikar, so at tey kunnu  hjálpa tær. Nú er summarferian longu byrjað. Tað, ið tú kanst gera, er at ringja ella skriva til tín flokslærara og siga, at tú hevur tørv á at tosa við hana og síðani avtala eitt tíðspunkt um at møtast. Um tú ikki hevur dirvi til at gera tað og ikki hevur onnur vaksin rundan um teg, sum tú hevur álit á, at tosa við, kanst tú altíð ringja ella kjatta við okkum her á ráðgevingini. Vit eru til taks mánadagar og hósdagar frá 14-22. Tú kanst sjálvandi eisini altíð skriva aftur til okkara. Eg vóni at tú fært dirvi at tosa við onkran. Tað er eitt stórt stig tann rætta vegin til at fáa tað betri.

Góða eydnu við øllum framyvir!
Vinarliga Tú & Eg Ráðgevingin