Góða tú, ið kallar teg “Tómligt”
Tað sæst á brævi tínum, at tú hevur hugsað nógv um tína støðu. Og tey svarini tú sjálv kemur við í tínum brævi vísa, at tú ert ógvuliga skilagóð. Tú hevur tikið støðu – til dømis til at tú ikki vilt tosa við ein tú kennir, men samstundis dugir tú at síggja, at tú mást hava hjálp til at loysa tínar trupulleikar. At tú dugir at síggja hetta, og at tú eisini ert motiverað til at fáa hjálp, fer at gera tína leið móti einum lívi uttan sjálvskaðan lættari.
Tað sum ofta hendir hjá fólki, ið skera seg, er at hetta í byrjanini er ein máti at viðgerða sterkar og neiligar kenslur. Sum tíðin líðir, so missir ein tó tamarhaldið. Hetta er størsta orsøk til, at tað oftast er neyðugt við serkønari (professionellari) hjálp fyri at basa sjálvskaðandi atburðinum.
Tey flestu ungu fólkini vit tosa við, sum hava skorið seg sjálvan, eru ótrúliga bangin fyri, hvat foreldrini fara at siga ella gera. Blíva tey óð? Skelda tey? Verður man læstur inni? Skal man innleggjast? O.s.fr. Tey flestu foreldrini eg havi tosað við, uppføra seg heilt øðrvísi enn børnini halda. Tey gerast kanska bangin ella kløkk. Men mest av øllum vilja tey gera hvat tey kunnu, fyri at hjálpa barninum hjá sær.
Royn og spyr teg sjálvan: Hvat er tað ringasta sum kann henda, um tú sigur mammu tíni, at tú skerir teg sjálva? Tað allar allar ringasta? Spyr síðani teg sjálva: Er tað sannlíkt at hetta, sum nú er tað ringasta tú kanst finna uppá, fer at henda í veruleikanum? Um tú hugsar teg væl um, stólar tú uppá hana? Plagar hon at hjálpa tær, um tú veruliga hevur tað ringt?
Tað kann verða nógv skomm tengd at tí at skera seg. Tú skammast, og ert kanska bangin fyri, hvat mamma tín fer at halda um teg framyvir. Tað nyttar ikki at hugsa soleiðis. Ístaðin mást tú góðtaka, at tú ert dóttirin, og at hon er mamman. Tað er hennara uppgáva at hjálpa tær, soleiðis at tú fært tað gott aftur. Hetta er ein uppgáva flestu foreldur taka í álvara.
Tú hevur brúk fyri hjálp, men tú kanst ikki fáa professionella viðgerð uttan at foreldur tínimamma tí góðtaka hesa viðgerð fyrst (av tí tú ikki ert 18 ár enn).
Tú kanst eisini ringja til okkara ráðgeving á nummar 116 111. Her kanst tú tosa við ein ráðgeva, og venja teg við at siga einum øðrum persóni frá tínum trupulleika.
Vónandi kanst tú brúka okkara ráð. Góða eydnu!
Vinarliga
Tú & Eg Ráðgevingin.
