Takk fyri brævið! Keðiligt, at tú ikki hevur skrivað, hvussu gomul tú ert. Tó vil eg royna at svara tær so gott sum eg kann. Tú greiðir frá einum fløkjasligum parlagi við fløkjasligum kenslum, sum viðhvørt eru heitar og so viðhvørt so illar, at tú hatar hann. Tú greiðir frá trupulleikum, sum tú ivast í, um tað eru trupulleikar. Tá tað fyllir so nógv hjá tær, og tú grætur um næturnar, kanst tú róliga kalla tað trupulleikar. Men talan er um trupulleikar, ið tú væl kanst vinna á og læra nakað av. Sum eg lesi brævið, virkar tað sum um at tú ikki megnar at gera so nógv sjálv, uttan at hugsa og hugsa. Kanska skalt tú royna at gera eitt sindur meira fyri at finna út av, um tú heldur tykkara parlag vera soleiðis, sum tú ynskir tað. Hvat tú kanst gera fyri at broyta støðuna, og hvussu tú kanst brúka minni tíð at hugsa og gráta um støðuna. Støðan broytist bara við at tú sjálv gerst meira aktiv og møguliga setur nøkur greið krøv og ynskir fram, sum hann skilir.   Ì mun til tínar vinkonur, dettur tú ikki bara burtur frá teimum. Tað er eisini nakað, ið tú skalt arbeiða við, sum er tín ábyrgd. Tá tú fært meira greiðu á tínum kenslum mótvegis dronginum, blívur tú eisini nøgdari og samstundis glaðari, og tað fara tínar vinkonur at leggja merki til. Tað kann vera, at vinkonurnar hjá tær kunnu hjálpa tær at fáa greiðu á, hvat tú vilt og ikki. Tað er altíð gott at deila tankarnar við onnur, ið ein kennir seg væl saman við. Tú kanst altíð venda tær til okkara umvegis kjatt ella telefon, um tú vilt hava eitt prát við okkum um, hvat tú heilt ítøkiliga kanst gera fyri at broyta støðuna, ið tú ert komin í.

Vit vilja fegin hjálpa tær!
Tú & Eg Ráðgevingin