Hey hey og takk fyri brævið!
Tað er gott, at tú vendir tær til ráðgevingina. Tú hevur tørv á hjálp sum skjótast. Tað er ongantíð ov seint.
Tað hevur stóran týdning, so at tú kanst koma víðari og orka at liva við tínum traumatisku barndómsupplivingum. Tú fortelur, at tú hevur skorið teg, tapt teg og roynt at taka lívið av tær fleiri ferðir. Tað vísir, hvussu ringt tú hevur tað og hvussu trupult tað er fyri teg at liva við tí, sum er hent. Tú hevur sjálv innsæð, at hatta ikki eru hóskandi mátar at handfara trupulleikan. Eisini, at tað ikki er ein góður máti at fáa kærleika við at fara við dreingjum fyri eitt kvøld. Beiggi tín og seinni maðurin, sum tú nevnir, hava traðkað yvirum tíni mørk og hetta hevur skatt teg. Sexuellur ágangur er oyðileggjandi fyri sjálvsálit og kropsfatan. Tað er ofta at man fer at ivast í, hvat er normalt og hvar mørkini ganga. Tá er lætt at verða útnyttaður.
Tað ljóðar sum tú søkir kærleika, men ert bangin og ótrygg og ikki veitst, hvønn tú kanst líta á. Tú ber eitt loyndarmál og brúkar nógva orku uppá at fjala tað við at vera smílandi og at hjálpa øðrum. Tú hevur stórt innlit í tína egnu støðu og tínar mátar at reagera uppá. Tað er eisini flott, at tú hevur orku at taka eina útbúgving og at tú hevur yvirskot at vera saman við vinkonum. Sum eg skilji, hevur tú ikki fortalt teimum um tín uppvøkstur. Tað haldi eg vera spell, tí tit hava líknandi upplivingar og kunnu hjálpa og stuðla hvørjari aðrari. Tú tekur ikki nakað frá teimum við at fortelja um teg sjálva. Eg eri sikkur í, at tær vilja hjálpa tær og lurta. Tú hevur jú gjørt tað sama fyri tær. Hetta kann knýta tykkum enn tættari saman. Tú hevur ein møguleika, sum fá hava við at tær hava upplivað nakað líknandi. Við tað at tær hava fortalt um sínar upplivingar, hava tær brotið tøgnina og tað skuldi gjørt tað lættari hjá tær at koma fram við tínum. Tit hava møguleika at skilja og hjálpa hvørjari aðrari ígjøgnum hetta.
Tað má vera sera trupult fyri mammu tína at tosa um hetta. Men hvat við at skriva ella maila til hennara og fortelja henni, hvussu tú hevur tað, um tínar tankar? Eg haldi, at tú skalt fortelja pápa tínum og mammu tíni, hvussu tað ávirkar teg at skula búgva saman við beiggja tínum. Tað er eitt sár, sum ikki kann lekjast, so leingi tú verður mint á tað hvønn dag og ikki fært nakra hjálp. Tit kunnu kanska tosa saman um at finna eina loysn, so antin tú ella beiggi tín býr onkra aðrastaðni.
Tú hevur tørv á at tosa um hendingarnar og hvussu tú hevur tað og at byggja tað uppaftur, sum er oyðilagt. Tað kann man ikki gera einsamallur og tú hevur tørv á professionellari hjálp. Tað er ikki lætt at hava álit á øðrum menniskjum, men tú mást ikki geva upp. Um tú ikki fært nakað burtur úr, mást tú royna okkurt annað, til tú finnur ta røttu hjálpina til tín. KRIS er ein ein felagsskapur, ið vit meta kann hjálpa tær. Tey geva persónliga og dulnevnda ráðgeving og eru útbúgvin til at taka sær av seinárinum hjá vaksnum, ið eru kynsliga misnýtt. Tey hava eisini sjálvhjálparbólkar og kunnu vísa á bøkur, filmar osfr. um evnið. Men ring ella maila til tey fyrst. So kunnu tey tosa við teg um, hvussu tú kanst fáa hjálp. Tlf.nr. er 448181, heimasíðan www.kris.fo og teldupostadressan er kris@kris.fo.
Tú ert annars altíð vælkomin at skriva, kjatta ella ringja til okkum. Vit lurta gjarna og geva ráð, um tú ynskir tað.
Tú & Eg Ráðgevingin
