Góða 18 ára gamla genta!
Beinanvegin, eg haldi ikki tú ert við barn, men tað er rætt, at ongin fyribyrging er 100% sikkur, heldur ikki ein P-stavur.
Tað sum tú merkir er ikki typisk fyri at vera við barn, og tó haldi eg tú sum skjótast skal fara til tín lækna og hava ein morgun-urin prøva við í einum lítlum reinum glasi. So kann sjúkrasysturin kanna bæði fyri graviditet og útihýsa sukursjúku. Tú veit kanska, at ein við byrjandi sukursjúku er tystur og drekkur nógv, men sjálvandi kann hettar vera heilt av tilvild.
Eg skilji, at tú altíð hevur haft óregluligar bløðingar, tað hava summar gentur uttan at tað er ein sjúka. Hettar verður ofta verri , tá ein hevur P-stav. Hormon innihaldi ger hettar, og menstuationin kann steðga heilt , men kemur aftur tá P-stavurin verður tikin. Tó haldi eg tú skal biðja læknan kanna undirlívið av tí, at tú hevur blett bløðingar, hetta kann vera tekin um lættan undirlívsbruna.
Tað er nógv betur at verða kannað enn at ganga og stúra og vera bangin. Tú kanst bara siga fyri tínum nærmastu og sjeikinum , at tú má kannast fyri óregluligar bløðingar.
Góða eydnu! heilsan Tú & Eg Ráðgevingin
Menu
