Barnabati var sett á stovn 22. mars 1980

Alt virksemi felagsins tekur støði í ST Barnarættindasáttmálanum. Vit virka fyri at bøta og menna um kor og trivnað hjá børnum og ungum, í fyrstu atløgu í Føroyum.

Vit arbeiða fyri at hjálpa og bøta um korini, uppvøkstur og menning hjá børnum og ungum í Føroyum. Vit ynskja, at øll børn og ung hava møguleikan til persónliga menning, og at tey fáa tann stuðul og umsorgan tey hava tørv á, og sum tey hava rætt til. Børn eru menniskju við javnmettum rættindum. Í ráðgevingini skal upplýsing, vegleiðing og ráðgeving miðja ímóti at styrkja sjálvskenslu hjá tí einstaka. Vit royna at skilja børn út frá teirra egnu upplivingum og fatan av sær sjálvum. Vit síggja aldrin eitt barn sum ein trupulleika. Vit møta børnum og ungum í teirra egna samanhangi og greiða teimum frá um rættindi teirra. Børn hava tørv á vaksnum og børn skulu møtast við viðurkenning.

Barnabati er ein landsfelagsskapur, og ein limafelagsskapur. Hetta merkir, at Barnabati virkar um alt landið. Barnabati er eisini ein NGO og ein NPO felagsskapur. Tað vil siga, at Barnabati er politiskt og átrúnaðarliga óheft, samstundis sum eingin persónur har fíggjarligan ágóða, um felagsskapurin hevur øktan fíggjarligan vinning.
Dagligt er tað aðalskrivarin, ið hevur alla ábyrgd av virkseminum. Á skrivstovuni starvast 3 fólk. Umframt hesi, eru onnur, ið loysa ymiskar uppgávur fyri Barnabata, harímillum sjálvbodnir ráðgevar til Tú & Eg Ráðgevingina.

Eyðgerð Nattestad, forkvinna
Annfinnur Heinesen
Sasho Bjartsson
Harald Joensen
Bartal Súsonnuson Hansen