Góða genta! Takk fyri brævið!
Tað er gott, at tú nú vendir tær til okkara við tínum trupulleika, sum er ein av teimum heilt tungu at ganga við. Tú dugir væl at greiða frá, hvussu tit hava tað heima. Eingin av tykkum hevur tað gott, og nú ert tú um at geva upp, og tað er væl skiljandi, sjálvt um tú hevur ein vilja av stál og ert ein fightari. Mamma tín er tann, sum heldur saman um familjuna, sjálvt um hon hevur sera ringar umstøður orsakað av bæði drekkaríi og ótrúskapi. Tað virkar sum um, at tað at pápi tín hevur verið ótrúgvur móti mammu tíni, nívir teg serliga nógv , netupp tí, at tú ikki kanst tosa við mammu tína um tað, ei heldur nakran annan. Tað er eisini tungt at ganga við sjálv.
Tá man er barn hjá einum alkoholikara, fær man nógvar av hasum trupulleikunum, sum tú hevur at stríðast við sjálv, t.d. at man ikki er nøgdur við seg sjálvan, at man hevur ringar tankar um seg sjálvan,tamkar um, hvussu man sær út og alt tað, sum man heldur, at man ikki dugir. So tú hevur nakrar kensluligar trupulleikar við tínari mynd av tær sjálvari, og tað kann ein sálarfrøðingur ella annar viðgeri, t.d. alkoholráðgevi, hjálpa tær við, so at tú kanst fáa tað betri, bæði í mun til teg sjálva, men eisini í mun til tíni nærmastu og onnur.
Tú ert 17 ár, so enn hava tíni foreldur ábyrgdina av, at tú hevur tað gott. Kanska er tað ringt hjá tær at tosa við mammu tína um, hvussu tú hevur tað innast inni, men tú kanst venda tær til Barnaverndartænastuna í tínum øki, sum kann hjálpa tær við t.d. at fáa viðtalur hjá einum sálarfrøðingi ella øðrum viðgera, sum hevur serliga vitan um tað at vera barn hjá alkoholikara. Viðgerðin kemur ikki at kosta tær nakað, um Barnaverndartænastan hjálpir tær. Um tú fert inn á www.bvs.fo, sum er heimasíðan hjá Barnaverndarstovuni, fært tú at vita, hvønn tú skalt venda tær til, har tú býrt. Barnaverndartænastan hevur tagnarskyldu, so tú kanst trygt venda tær til teirra. Tað er ein ráðgeving, kallað Rúslinjan, sum er fyri familjuna hjá alkoholikaranum, og hon er knýtt til Bláa Kross. Tú kanst fara inn á www.blakross.fo fyri at fáa meira at vita um ráðgevingina.
Tú kanst eisini kjatta anonymt við ein ráðgeva hjá okkum.
Blíðar heilsur Tú & Eg Ráðgevingin
