Hugsa um, hvussu týdningarmiklir tryggir og inkluderandi felagsskapir eru fyri trivnað, gleði, spæl, menning og læring hjá børnum. Og hugsa so tað øvuta: At vera eitt lítið barn, sum ikki finnur nakran at spæla við. Sum er í útjaðaranum av felagsskapinum í barnagarðinum ella í skúlanum.

Hjá hesum barninum verður ivin lættliga sáddur: Eri eg góð/ur nokk sum eg eri? Eri eg verd/ur at spæla við? Hvar hoyri eg heima?
Tær royndir, sum børn fáa við felagsskapi og sambondum í dagstovnum og í skúlanum, verða tiknar við víðari í lívinum. Eru royndirnar góðar, geva tær íkast til sjálvsvirðið hjá barninum, og gevur barninum mót til at traðka inn í nýggir felagsskapir – Í frítíðini, undir útbúgving, í persónligum sambondum og í arbeiðslívinum. Eru royndirnar keðiligar, kunnu tær leiða til neiligar kenslur, misálit á umhvørvi og einsemi.
Tí er tað umráðandi at arbeiða áhaldandi og miðvíst við at skapa tryggar og inkluderandi barnafealgsskapir í dagstovni og skúla – frá at børnini eru heilt smá.
Hetta kann Betri Vinir hjálpa við.

Betri Vinir tekst við tí øvuta av happing

Betri Vinir hevur tilfar og tiltøk, sum eru miðvíst snikkað til tað námsfrøðiliga virksemi til trivnað og sosialar førleikar hjá børnum í dagrøkt, vøggustovu, barnagarði og í innskúlingini (0. – 3. flokkur).

Tiltakið tekur støði í at arbeiða við at fremja tað øvuta av happing: Ein tryggan og inkluderandi barnafelagsskap. Betri Vinir fyribyrgir happing í tí ávísa barnafelagsskapinum, sum tiltakið verður brúkt í, og veitir samstundis børnunum sosialar førleikar og marknasteinar, sum kunnu fylgja teimum víðari í lívinum.

Betri Vinir er ein karmur fyri arbeiðinum við at skapa tryggar barnafelagsskapir, og stuðlar tykkum í at læra børnini hvat tolsemi, viðring, umsorgan og dirvi hava at týða, á hóskandi støði.

Vaksin – dagrøktarar, námsfrøðingar, lærarar og foreldur – eru umráðandi fyrimyndir í tí sosiala lívinum hjá børnunum, og tí hevur Betri Vinir eisini tilfar og tiltøk til tey vaksnu.

Betri Vinir er grundað á gransking, sum vísir, at happing er eitt bólkafyribrigdi, sum vísir seg í barnabólkum við lágum tolsemi.