Halló og takk fyri brævið!
Tað kann vera ein líka stórur trupulleiki at vera ov klænur sum at vera ov tjúkkur. Vit fáa regluliga brøv, har ungar gentur eru ov klænar og ynskja at taka uppá. Tað ger tað ikki lættari at lítið og einki at finna um hetta evni í bókum og á netinum. Tú hevur trupult við at taka uppá og gert tað rætta við at eta ofta. Fyri at taka uppá mást tú fáa fleiri kaloriur inn í kostin, men tað loysir seg ikki at eta ósunt. Tvs. at tú skalt fylgja somu reglum sum øll onnur. Tú skalt eta nógvar máltíðir og eta tað, ið inniheldur feitt, protein og kolhydrat. Tú skalt bara hava fleiri máltíðir inn og sum innihalda fleiri kaloriur. Et groft breyð og groft pasta og groft rís og halt teg frá sukri og hvítum breyði. Et soltnar mjólkarvørur sum t.d. mjólk, jogurt og ost. Et soltið kjøt ella sker feittið frá. Et fisk, høsnarunga ella kalkun. Mjólkarvørur og kjøt innihalda djórafeitt, sum verður hart í køliskápi og sum er sera ósunt. Et frukt og grønt. Nú ljóðar tað kanska øvugt at tú skalt eta so sunt fyri at taka uppá. Men við at eta meira av sunnum feitti fært tú ekstra kaloriur. Plantufeitt er flótandi í køliskápi. Tú kanst steikja fisk og annað á pannuni í rapsolju ella olivenolju. Panerað flak t.d. sýgur nógv feitt í seg. Tú kanst tilseta olju til matin, t.d olivenolju omaná salat og í dressing. Og linfrøolju í jogurt t.d. Oljurnar hava ongan smakk og síggjast ikki, tá tær verða rørdar upp í t.d. jogurt. Et nøtur og mandlur og peanut butter. Tað kann virka ólekkurt at eta so nógv feitt, men plantufeitt er sunt, hóast tað fitar. Tú kanst prøva teg fram og finna út hvat tær dámar. Við at eta kjøt ella fisk til hvørja máltíð, fært tú protein, sum eru við til at byggja musklarnar upp. Ístaðin fyri konditiónstrening er best at tú venur styrkivenjing fyri at byggja musklarnar upp. Soleiðis kemur tú at viga meira og fært tú ein vælbygdan kropp.

Góða eydnu!
Tú & Eg Ráðgevingin