Góða ‘Ung genta við sjálvmorðstankum’
Takk fyri brævið. Eg kann lesa meg fram til, at tú hevur álvarsligar tankar og fer ígjøgnum eina trupla tíð. Tað er sera umráðandi at tú tosar við ein vaksnan um tína truplu støðu, tí tú hevur heilt víst tørv á hjálp.
Tað er sera álvarsamt at skera í seg, sum tú ger. Tað má steðga skjótast gjørligt! At skera í seg kann linna sálarliga pínu, men henda linnan varar bert eina løtu. Tað kann tykjast sum ein máti at flýggja frá teim ringu tankunum, sum gera teg kedda og sorgarbundna. Men við tíðini er hetta ikki nøkur góð loysn, tí teir ringu tankarnir koma aftur, og sárini blíva djúpri og meira vandamikil, og so kann tað enda galið. Tað kann eisini verða ringt at steðga við at skera í seg, tí ein kann blíva vanabundin av tí. Tískil er tað umráðandi at tú steðgar við at skera teg sum skjótast.
Kanska tú kundi roynt onkran annan máta at sleppa av við ringu tankarnar uppá. T.d. kundi tú avtalað við teg sjálva, at hvørja ferð tú følir trongd til at skera í teg, so kanst tú ístaðin royna at skriva niður alt tað sum tyngir og pínir teg í eina dagbók, sum bara tú lesur í. Fyri summi hjálpir hetta at fáa greiðu á sínum tankum.
Um tað ikki ber til, ella ikki hjálpir at tosa við tíni foreldur, er tað umráðandi at tú finnur onkran annan vaksnan sum tú hevur álit á t.d. heilsusystrina á tínum skúla, ella ein lærara sum tær dámar væl at tosa við. Tað kann eisini vera foreldur hjá einari vinkonu ella onkur annar í tínari familju.
Mítt ráð er eisini at tú einsamøll ella saman við einum vaksnum fer til lækna fyrst og so møguliga seinni til ein sálarfrøðing, tí teir hava oftast tey bestu ráðini til at kunna hjálpa. Læknin hjá tær kann vísa tær til ein sálarfrøðing.
Tú ert eisini sera kedd um at tað er liðugt millum teg og sjeikin. Tað skilji eg væl. Tú skrivar eisini, at tú ikki veitst hví tað varð liðugt. Einasti mátin at fáa hetta at vita, er nokk at spyrja hann. Tú spyr eisini, hvat hendir, um tú kemur saman við sjeikinum aftur. Tað dugi eg ikki at svara uppá. Men um tit koma saman aftur, so kann tað eisini henda at tað verður liðugt aftur.
Tú skrivar at tú ikki vilt tosa við nakran, men um man sum tú hevur tankar um at taka lívið av sær, er tað sera umráðandi at tosa við onkran. Kanska tú finnur onkran, sum tú følir at tú kanst tosa við. Tú ert eisini vælkomin at ringja til “Tú & Eg Ráðgevingina” á  tlf. 116 111 og tosa við ein ráðgeva, sum kann royna at hjálpa tær víðari úr hesi støðu.

Vinarliga,

Tú & Eg Ráðgevingin