MENTOR

EIN MENTOR ER HAR, TÁ IÐ TÚ HEVUR BRÚK FYRI HONUM

Ein mentor er ein vaksin, sum ikki heilt hevur gloymt, hvussu tað er at vera ungur. Ein, sum tú kanst tosa við um alt, og sum tú kanst gera ymiskt stuttligt saman við. Tú og tín mentor hittast einaferð um vikuna. Tit kunnu t.d ganga túrar saman, fara í biograf, koyra go-kart, fara ein túr á café, ella bara práta. Øll børn og ung í aldrinum 12-18 ár kunnu fáa ein mentor. Tað er ókeypis at hava ein mentor, og Barnabati ber kostnaðin fyri tað, sum tit gera saman.

EG VIL HAVA EIN MENTOR

SKRIVA TIL MENTOR.

HVAT ER EIN MENTORTILGONGD

Ein mentor gevur tær møguleika at mennast og trívast, og at bara vera tú. Tín mentor kann hjálpa tær við at skilja eitthvørt, sum kanska er trupult fyri teg at skilja, og somuleiðis hjálpa tær við at loysa ymsar tvístøður. Tín mentor er har fyri at stuðla og vegleiða tær. Ein vaksin fyrimynd, sum tú kanst fáa hjálp og stuðul frá, samstundis sum tit hava tað stuttligt saman.

TAÐ KOSTAR EINKI AT HAVA EIN MENTOR FRÁ BARNABATA

Ein mentortilgongd hjá okkum kostar einki. Tú og tín mentor fáa alt goldið av Barnabata, eisini tá ið tit fara á café og annað.

HVØR KANN FÁA EIN MENTOR?

Øll børn og ung í aldrinum 12 til 18 ár kunnu fáa ein mentor. Tað einasta sum krevst, er, at tíni foreldur/verjar vátta, at tað er í lagi, at tú fært ein mentor.

HVUSSU GERI EG FYRI AT FÁA EIN MENTOR?

Tað gert tú við at seta teg í samband við okkum á tlf. 610140, ella á teldupost mentor@barnabati.fo.
Tá ið vit hava móttikið tína umsókn, seta vit okkum í samband við teg og tíni foreldur, og okkara mentorsamskipari kemur síðani heim til tykkum til eitt prát.
Síðani royna vit at finna tær ein mentor. Vit royna altíð at finna ein mentor, sum passar til tín. Ein, sum kann møta tínum tørvum, ynskjum og áhugamálum.
Tá ið vit hava funnið tær ein mentor, koma mentorsamskiparin og mentorurin heim til tykkum, har tú og mentorurin møtast og læra hvønn annan at kenna.
Um alt kennist gott, so halda tú og mentorurin áfram at hittast.

TIL FORELDUR OG VERJAR

Mítt barn ynskir ein mentor. Hvat er tað?

Mentorskipanin er ein skipan til børn og ung í aldrinum 12-18 ár. Skipanin er ein partur av virkseminum hjá vælgerandi felagsskapinum Barnabata, har endamálið er at fáa ung at trívast og mennast, og somuleiðis at styrkja um teirra sjálvsálit og sjálvsvirðið. Okkara mentorar eru sjálvbodnar eldsálir, sum ynskja at gera ein mun.

Ein mentor møtir tínum barnið har tað er, og stuðlar tí í at røkka perónligum málum. Ein mentor lurtar og vegleiðir. Saman við mentorinum kann barnið hjá tær eisini fáa góðar upplivingar, ið kunnu kveikja undir áhuga og lívsgleði.

HVAT INNIBER EIN MENTORTILGONGD?

Mentorurin og barnið/tann ungi møtast áleið einaferð um vikuna, har tey gera ymiskt saman, sum barnið/tann ungi tímir. Tað kann vera at venja saman, fara í biograf, á café, ganga ein túr, ella bara práta saman. Samskiftið koyrir ímillum mentorin og barnið/tann unga, men mentorsamskiparin hjá Barnabata hevur regluligt samskifti við mentorin og við foreldrini um neyðugt. Mentortilgongdin verður eisini eftirmett við jøvnum millumbilum, har mentorsamskiparin og mentorurin koma heim til eitt prát við foreldrini og barnið/tann unga, har saman verður tosað um, hvussu gongst.

Ein mentortilgongd kann varða í alt frá 6 mánaðum til tvey ár, alt eftir hvør tørvurin og ynskini eru.

HVAT ER ENDAMÁLIÐ VIÐ AT HAVA EIN MENTOR?

Endamálið við at hava ein mentor er at fáa ungdómin at trívast, mennast og búnast. At geva teimum sjálvsálit og at styrkja tey. At geva teimum eina vaksna fyrimynd, ið tey kunnu spegla sær í, og sum kann vegleiða og stuðla teimum.

Nógv ung kunnu hava gott av at hava ein eyka vaksnan persón at tosa við um tað, sum tey kanska ikki vilja tosa við síni foreldur ella lærarar um. Tað kann eisini verða soleiðis, at tú sum vaksin ikki følir, at tú nær heilt inn til títt barn, ella at tit av og á hava trupult við at tosa saman.

TAÐ ER TRYGT OG UTTAN KOSTNAÐ

At hava ein mentor hjá Barnabata kostar einki. Mentorurin kemur til staðið har tit búgva, ella har barnið kennir seg trygt at fara. Barnabati rindar fyri tað, ið mentorurin og barnið gera saman. Tað kann eitt nú vera, um tey fara út at eta saman, í biograf, til okkurt tiltak, at venja saman osfr.

VIT TAKA TRYGDINA Í ÁLVARA

Allir mentorar eru yvir 20 ár og hava gjøgnumført eitt skeið fyri mentorar, umframt verið til samrøðu við mentorsamskiparan hjá Barnabata. Fyri at kunna gerast mentor er eisini krav um reina revsi- og barnaváttan.

HVUSSU FÆR MAN EIN MENTOR?

Barnið/tann ungi útfyllir eina umsókn um at fáa ein mentor. Síðani kontakta vit tykkum og koma heim til at kunnandi prát, samstundis sum vit fara at leita eftir einum mentori. Vit leggja dent á at finna ein mentor, ið møtir teimum tøvrum, ynskjum og áhugamálum, ið barnið/tann ungi hevur. Tá ið vit hava funnið ein mentor, koma mentorsamskiparin og mentorurin heim til tykkum, har barnið og mentorurin møtast fyri fyrstu ferð.

SPURNINGAR?

Tit eru altíð vælkomin at ringja til okkum á tlf. 610140 ella senda okkum ein teldupost á mentor@barnabati.fo

MENTOR

Virkisumráði

Um Barnabata